NATZAK antolatuta, hitzaldia izan zen ostegunean. Udala eta parte-hartzea izan ziren hitzaldiaren ardatza. Asier Blasek parte hartzeari buruzko alde ideologikoa landu zuen eta zenbait adibide ere jarri zituen. Mila Apezetxeak aurreko legealdian izan zen aurrekontu parte hartzaileen esperientzia azaldu zuen. Hitzaldia Natzak antolatutako hitzaldi ziklo baten barruan kokatzen da. Udal parte hartze demokratikoaz gain, beste honako gaiak lantzeko asmoa ere badute: herri ereduaren eztabaida, kultura eta migrazioak. Hitzaldietako ekarpenak bildu eta herritarren artean zabaltzeko asmoa ere badute.
´Parte hartze esparruak bultzatu behar dira`
Asier Blasek funtsean esan zuen parte hartzea beharrezkoa dela gizartea eraldatzeko eta dauden gatazkak azaleratzeko, eta herritarren artean eztabaidatzeko. Parte hartzea hitza modan dagoela aipatu zuen, Banco Mundiala bezalako erakunde batek ere erabiltzen duena. Bere hitzetan parte hartzeak gizartea eraldatzeko behar luke izan. Horrez gain, esan zuen beharrezkoa dela herritarren arteko eztabaida ematea prozesu horretan, eta elkarren artean harremanetan jartzea. Parte hartzean tokian tokiko tradizioa eta kultura kontutan hartu behar direla ere aipatu zuen. Bukatzeko gizartean beren ahotsa azalerazteko arazoak dituztenei bideak erraztu behar zaizkiela azpimarratu zuen, denek parte hartzeko aukera izan dezaten, era batera edo bestera.
Aurrekontu partehartzaileak
Mila Apezetxeak aurreko legealdian martxan jarritako aurrekontu partehartzaileek nola funtzionatu zuten azaldu zuen, baita balorazioa egin ere. Azaldu zuenez, zinegotzi talde batek eta interesa izan zuten herritar talde batek diseinatu zuten aurrekontu partehartzaileen metodologia, beste esperientzia batzuetan oinarrituta. Bilerak sektoreka antolatu zituztela azaldu zuen eta herritar guztiak parte hartzera gonbidatu zituzten. Aurreneko bileretan herritarrak informatu egin zituzten eta aurrekontu bat zer den azaldu zuten, besteak beste. Mahai gainean jarri ziren agertutako pertsona eta taldeen beharrak eta argudiatu egin ziren. Lehentasunak markatu ziren eta denen artean bozkatu. Mila Apezetxeak bilera hauen balorazio positiboa egin zuen, nahiz eta batzuetan neketsua izan zela aipatu. Parte hartu zuten herritarrek, eta zinegotziek beraiek, asko ikasi zutela aipatu zuen. Zailtasunen artean aipatu zuen zaila izan zela aldarrikapenetatik elkarlanerako saltoa, baina piskanaka aurrera egin zutela azaldu zuen. Oposizioak ez parte hartu izana ere faltan somatu zuen. Aurrekontuetaz gain, udal mailako beste parte hartze mekanismo batzuk ere aipatu zituen Mila Apezetxeak: Udal batzorde informatiboetan herritarrek parte hartu dezaketela, 2 patronatuetako juntetan herriko ordezkariek parte hartu dezaketela eta gai zehatzen inguruko kontseiluak sortu daitezkeela, alegia.