Hernaniko Etxerat-ek mozio bat aurkeztuko du Udalean (seguruenik hurrengo plenoan), Iñaki De Juanaren egoerari buruz, eta sinadura bilketa bat hasiko dute gaur mozioak ´herritarren babesa` izan dezan. Preso donostiarraren egoera oso larria dela, eta Udalak mozioa urgentziaz tratatzea eta onartzea eskatzen du erakundeak.
Bost puntuko mozioa
Mozioan Udaletxeari eskatzen diote Iñaki De Juanaren auzian konpromisoak hartzeko, bost puntutan: -Udaletxeak kezka azaltzea De Juanaren biziaren arrisku larriagatik eta elkartasuna adieraztea senide eta ingurukoei. -Baldintzarik gabeko askatasuna esijitzea Espainiako Gobernuari. -De Juanaren egoera ´bahiketa politikotzat` definitzea. -Iñakiren askatasuna esijitzeko konpromisoak hartzea. -Mozioaren berri ematea herritarrei, bandoaren bitartez, eta komunikabideei.
Sinadura bilketa
Etxerateko kideek adierazi dute mozioak ´herritarren babesa` izateko, sinadurak biltzen hasiko direla. Gaur hasiko dira lan horretan eta 18:00etatik 20:30etara Kixkal tabernako iskinan izango dira. Hilaren 26an ere bertan izango dira ordutegi berdinarekin eta 28an, Txotx irekiera ekitaldian, Plazan izango dira, 11:00etatik 14:00etara.
´Hil ala biziko egoera`
Iñaki De Juana Madrilgo 12 de octubre ospitalean dago gaur egun eta Etxeraten esanetan bere egoera ´hil ala bizikoa` da: ´bere nahiaren aurka elikatzen ari dira Iñaki, eskuak eta hankak ohera lotuta, giza eskubideak ukatuta`. De Juanak 2004. urtean bete zuen kondena, baina 2006an, bi iritzi artikulurengatik, beste 13 urteko kondena ezarri zioten. Hori dela-eta, gose grebari ekin zion, eta ´bukaeraraino` eramateko asmoa erakutsi du. Orain burutzen ari dena, bigarren gose greba da eta guztira 120 egun baino gehiago daramazki protesta horrekin.