Gaur gauean izango da tabernetako bertsolari txapelketaren finala, Garin tabernan, 23:00etan. Bertan, aurtengo 6 finalistak izango dira: Anjel Arruti, iazko txapelduna; Iraitz Santakruz, iazko azpitxapelduna; Arkaitz Santakruz; Arnaitz Lasarte; Esteban Martiarena, estreinakoan izan ezik edizio guztietan parte hartu duena; eta Urko Kasado. 16 parte hartzaile izan dira aurten eta kanporaketa bat egin dute finalistak aukeratzeko.
Ofizioan eta bakarka
Gaurko saioan ofizioan eta bakarka aritu beharko dute finalistek. Ofizioan hiruna bertso kantatuko dituzte zortziko haundian eta zortziko txikian, eta bakarka bina, modalidade ezberdinetan. Azken bi finalistak ere bakarka eta ofizioan arituko dira, txapelaren bila. Epaimahaia 4 lagunek osatuko dute, baina ez omen zaio garrantzi haundirik ematen puntuatzeko irizpideei: ´epaileak Bertso eskolakoak, kamareroak, kaleko jendea eta abar izaten da eta bakoitzak deritzon bezala puntuatzen du` dio Oxanek, antolatzaileetako batek.
Jarkiko elkartean sortutakoa
Aurtengo txapelketa 13garrena da eta Jarkiko elkartean sortu zuen tabernetan bertsotan aritzen zen lagun talde batek, ´gerora Iruntxin ere egin genuen eta azken urteotan Garinen egin dugu` dio Oxanek. Aldaketa batzuk izan dira, eta onerako: ´maila igo egin da azken urtetoan eta parte hartzaile kopurua ere bai. Lehen kosta egiten zitzaigun jendea bilatzea`.