Datorren astean onartuko dira, seguruenera, 2007ko Udal Aurrekontuak. Joan den astean pasa ziren aurrekontuak Hazienda Batzordetik eta bertan aurreikusi zenez aurrekontuak datorren astean onartuko dira Gobernu Taldean dauden alderdien aldeko botoarekin (EA, EAJ, EB). PSE-EEk eta PPk aldeko botoa ez dutela emango iragarri dute. Udal aurrekontua 24.844.736 eurokoa izatea aurreikusi da, iaz baino 43.335 euro txikiagoa. Kirol eta Ongintza patronatuetakoak kontutan hartuta , guztira 33.906.826 euroko aurrekontua aurkeztuko da plenora, iaz baino 5.493.986 euro gehiago aurreikusten dituen aurrekontua. Aurrekontuek emendakinak jaso dituzte: PSEren aldetik osoko emendakina eta zehatzagoak diren beste bost. BHk osoko emendakina aurkeztu du. PPk ez du emendakinik aurkeztu, baina aurrekontuak eztabaidatuko diren plenoan zenbait objekzio azalduko ditu.
Udaletxeko aurrekontua
Udal aurrekontuen sarreren atalean, iazko aurrekontuarekin alderatuta, ohiko sarrerek gora egingo dute, %8,87 guztira. Gehien igoko diren diru sarrerak izango dira zeharkako zergen bidez lortutakoak (instalazio, eraikuntza eta obren gaineko zerga), %41,11. Ondare sarrerak ere igoko dira, % 1.114,78 batez ere, Latsunbe Berriko garaje publikoen kontzesioarengatik eta aprobetxamendu forestalengatik. Gainerako sarrerek behera egitea aurreikusi da aurrekontuetan. Hirigintza aprobetxamendutik ateratako kopuruak, (Txantxila, Karabel, AMReko hirigintza eragiketak), behera egin du % 7,43. Lur hauetan etxeak egitea oraindik ere onartu ez dela eta zenbait kritika jaso ditu Gobernu Taldeak oposizioaren partetik. Oposizioak azaldu duenez, inbertsio asko diru honekin ordaintzea aurreikusi da. Joxan Rekondo, alkateak, azaldu duenez, ´aurrekontuak aurreikuspen bat dira, eta horrela planteatu izan dute aurretik pasa diren Gobernu Taldeek ere`. Gastuei dagokionean, gora egingo dute Udaletxetako arlo ezberdinetan egingo diren gastuek ondare eta zerbitzuetan, %12,70. Atal honen aurrekontuaren erdia zerbitzu publikoetako arloak eramango du. Udalak ematen dituen diru laguntzek orokorrean gora egingo dute, guztira 4.456.509 euro. Kontutan hartu behar da kopuru honetatik, 3.343.418 euro Ongintza eta Kirol Patronatura bideratuko direla. Inbertsioek, behera egingo dute, %25,73.
Kirol Patronatuko aurrekontua
Kirol Patronatuko aurrekontuak gora egin du, iaz baino 211.036 euro gehiago aurreikusten baitira. Iñaki Barrio Lehendakariak azaldutakoaren arabera aurten egingo diren lanik garrantzitsuenak izango dira, bi pistetako estalkia jartzea, gimnasioa haunditzea eta makina berriak erostea. Landaren argi torreak ere jarriko dituzte. Kiroldegiko igerileku eta wellness aretoari dagokionean, lehendakariak azaldu du, 2007an hauek egiteko partidarik balego sartzen saiatuko direla. Wellness eremuari garrantzia eman dio Barriok, ´herritarrek gero eta reuma eta hezurretako arazo gehiago dituzte eta beste herrietara joan behar dute ur txorro, dutxa eta sauna bidezko tratamendu hauek jasotzera`. Welness eremua frontoi azpian jarri nahi lukete.
Ongintza Patronatuko aurrekontua
Ongintza Patronatuko aurrekontua ere igo egin da, 716.054 euro. Andoni Amonarraiz Patronatuko Lehendakariak azpimarratu du, inbertsioetan kopuru haundirik ez bada ere zerbitzuak hobetzeari eman diotela garrantzia. Gizarte zerbitzuetarako 2.708.161 euro aurreikusi dira 2007ko aurrekontuetan. Bestalde, aipatu du, Zaharren Egoitza haunditzeko lanak 2007-2008an hasiko direla. 2006ko aurrekontuetan, inbertsioen atalean agertzen da lan hauetarako partida. Lanak 4.189.014 eurotan daude baloratuta. Zaharren Egoitza haunditu eta legeari egokitzeko obrak egin, eguneko zentroa haunditu, pertsona autonomoentzako apartamentuak eta etxebizitza sozialak egingo dira.
PSE-EE: «aurrekontuek ez dute sinesgarritasunik eta ez dakarte ezer berririk»
PSE-EEk osoko emendakina eta zehatzagoak diren beste bost emendakin aurkeztu ditu.
Pse-eek osoko emendakina eta beste bost emendakin aurkeztu ditu, bere iritzira aurrekontu hauek ez dute sinesgarritasun haundirik, batez ere zenbait diru sarrera garrantzitsu (etxeak egiteagatik udalak lizentzia eta aprobetxamenduen bidez lortuko lituzkeenak) AASSak onartzearekin lotuta daudelako. Hori dela eta eskatu du aurrekontuak berriro idazteko. Inbertsioen atalean, kritikatu du inbertsioetarako partidak jarri izana gero gauzatzen ez direnean. Jakitera eman dutenez, azken legealdia hasi zenetik 5.240.677 euro daude bukatu gabeko inbertsioetan, horietatik 2.002.467 euro tramitazioa hasi gabeko inbertsioak direla aipatu du. Udalaren lurzoru-ondare legea behar bezala erabiltzen ez dela ere iruditzen zaio PSE-EEri. ´Lurrak eskuratzeko erabili beharrean, beste bide batez finantziatu zitezkeen lanak ordaintzeko erabiltzen baitira`. Lurrak eskuratzeko partidarik jarri ez izana ere ez zaio ondo iruditzen. Ongintza Patronatuari Udalak egiten dion ekarpena 2007an jeitsi izana ere kritikatu du, ´gizartearen beharrak gero eta haundiagoak direnean`. Arlo honetan etxez etxeko zerbitzuan bono soziala delakoa jartzea ez zaio egokia iruditzen, ´zerbitzua merkatuaren legearen eskuetan uzten delako, kontratazio irregularrak egiteko arriskua dakarrelako, eta ez delako ziurtatzen pertsonalaren formazioa nahikoa denik`, besteak beste. Hezkuntza eta lan arloaz dio 2007rako programatuko kurtsoak aspaldian berdinak izan direla. Dagoen lan beharra aztertu eta behar horiei moldatutako kurtsoak antolatzea proposatzen du. PSE-EEk proposatu du etxez etxeko zerbitzuko pertsonala hezteko kurtsoak martxan jartzea, alor horretan lan eskaintza haundia dagoelako. Kooperazioari dagokionean, Hernanirekin senidetutako herrientzako partidarik gorde ez izana salatu du. Zenbait lanposturen kontratua urte erdirako soilik egin izana ere kritikatu du PSE-EEk, ´hauteskundeetara arte`, bere iritzira lan postu hauek beharrezkoak dira urte guztian.
PP: «aurrekontuak aurreko legealditakoen jarraipena besterik ez dira»
PPk ez du emendakinik aurkeztuko, baina bere ikuspuntua azalduko du plenoan.
Ppk, aurreratu duenez, ez du emendakinik aurkeztuko, hala ere datorren asteko plenoan azalduko ditu bere 2007ko aurrekontueriko dituen desadostasunak. PPko zinegotziaren iritzira, aurrekontuak aurreko legealdietako aurrekontuen jarraipena besterik ez dira eta ez dakarte inolako berritasunik. Zorpetze maila igo egin dela ohartarazi du eta igoera hori kontrolatu egin beharko litzatekeela uste du. Gastu arruntak igo izana ere PPko zinegotziaren kezka piztu du eta uste du, gastuetan lehentasunak jarri behar direla. Horrez gain dio ´gastu asko ez direla beharrezkoak eta horien atzetik interes partidistak edo ideologikoak` daudela. Garatzeko bidean dauden herrialdeei emandako partidari jarraipena egitea ere proposatuko du PPko zinegotziak, ´diru horren helburua betetzen dela ziurtatzeko`. Lurra eskuratzeko partidarik ez aurreikusi izana ere ez zaio ondo iruditzen, ´nahiz eta legea betetzen den, partida bat gorde behar litzateke horretarako` azaldu du. Txantxilla, Karabel eta AMRko hirigintza eragiketengatik ateratzea aurreikusi diren diru sarrerak ziurrak ez direla ere nabarmendu du eta horrek tesoreria desfasea ekarri dezakela ohartarazi nahi izan du. Urtean zehar egiten diren kreditu aldaketak, diru partida aldaketak, gehiegizkoak direla ere iruditzen zaio. Udalak Buruntzalderako euskara proiektuetarako ematea aurreikusi duen 43.000 euroko laguntzari buruz PPko zinegotziak dio, ´Buruntzaldeak ez duela koordinaziorako organorik ezta izaera juridikorik ere `. Hori dela eta ez zaio partida hau mantentzea ondo iruditzen.
BH: «Aurrekontu hauek finantza ikuspegitik iruzur bat dira eta bazterketa egoera mantentzen dute»
Bildu Hernani plataformak osoko emendakina aurkeztu die aurrekontuei eta eskatu du, prozesu parte hartzaile baten bidez aurrekontu berriak aurkezteko.
BHk osoko emendakina aurkeztu die aurrekontuei. Funtsean, salatu du aurrekontu hauen izaera baztertzailea ´3.661 hernaniarren aukera politikoa baztertuta dagoelako`. Horrez gain, salatu du aurrekontu hauek osatzerakoan ez dela ´herritarren partehartzea bilatu`.
Ziurtasun eza
BHk aipatutako beste puntu bat da ´hirigintza aprobetxamendu eta hirigintza lizentziatan diru sarrera garrantzitsuak aurreikusten direla, baina inolako ziurtasunik gabe, izan ere AASSen berrikuspen prozesua eta hainbat aldaketa puntualen tramitazioa oraindik ere onartu egin behar baitira`. Txantxillak, Karabel eta AMRekin hirigintza eragiketak aipatu dituzte. Azaldu dutenez, hirigintza sarrera hauek inbertsioetara bideratu dira eta inbertsioen aurrekontuaren %65a zalantzan jarriko lirateke, onartuko ez balira. Horrekin batera aipatu du hirigintza aprobetxamendutik ateratako dirua, etxebizitza publikoan inbertitu beharko litzatekeela eta salatu du aurrekontu hauetan Udalak ez duela saiakerarik egiten lurra eskuratzeko.
Beste hainbat gai
Alkate eta zinegotzien soldata eta dietetan diru asko gastatuko dela ere aipatzen du. Kulturari dagokionean aipatzen dute kultur taldeentzako dirulaguntzak gutxitu egingo direla eta ez dela partidarik gorde kultur ekipamenduentzat edota kultur areto berri batentzako. Turismoari dagokionean eskatzen dute Hernaniko turismo gida bat egiteko, eta Chillida Leku eta sagardotegietaz gain, Urumea ibai ingurua eta Kaxkoa ere kontutan hartzeko. Etxebizitza sailari dagokionean, BHren iritziz Udalak ez du etxebizitza politikarik. Eskatzen dute: etxebizitza gizarte kontseilua sortzea, alokairuzko etxebizitza parke publikoa egitea, eta etxebizitza hutsetan eragitea neurri fiskal, ekonomikoak eta politikoak bultzatuta. Kirolari dagokionean, dio Kirol patronatuko gastuak ´izugarri igo` direla, eta Udalak patronatuari egindako ekarpena %36 igo dela. Igoera ur parkeak ekarri duela azaldu du. Patronatuak ikastaroak emateko kontratatu duen enpresa berriak, ´entxufea` medio BHren hitzetan, ekarritako gastu igoera ere aipatu du. Udalak Ongintza patronatuari egindako ekarpenak, ordea, behera egin duela salatu du, ´premia larrieneko pertsonei erantzuten dion zerbitzua`. Etxez etxeko laguntza bono sistema ere ez zaio egokia iruditzen. Ur eta zabor zerbitzuengatik Udalak Añarbe eta San Markosi egin beharreko ekarpenak gora egin duela salatu du. Batetik, eskatu du ur baliabide propioak lantzeko. Bestetik, zaborren inguruko ekarpena erraustegia alde batera uzteko eta konposta eta bestelako alternatibak martxan jartzeko erabiltzea eskatu du. Dirulaguntzei dagokionean presoen senideentzako eta Udalbiltzarako partidarik gorde ez izana salatu du BHk.