Joxan Rekondo eta auzolotsa

Berriki jakin dugu Joxan Rekondok ez duela bere burua aurkeztuko Udal hauteskundeetan. Lerro hauen bitartez aipatu nahiko nituzke gizon honen ibilbidearen harribitxi batzuk. Ezagun da hiru aldiz izan dela alkate, eta hiruetan bere zerrenda inoiz ez da bozkatuena izan. Lehen aldian EA, EAJ eta PSE-EEren laguntzaz lortu bazuen, bigarrenean, horietaz gain PPren (bai, PP) laguntza behar izan zuen ezker abertzaleari alkatetza kentzeko. Hirugarrenean, aldiz, ezker abertzalearen apartheid egoera ederki baliatu du berriro alkatetza lortzeko, inongo zirrikiturik utzi ez diolarik lehenengo indarrari udalean lan egiteko. Dena den, bitxikeria moduan, bigarren legegintzaldian alkate izanik, hain zabar eta harro jokatu zuen, non hurrengo hauteskundeak Euskal Herritarrok-ek irabazi zituen gehiengo osoz. Urteotan egindako lanaren inguruan, labur-labur aipatzeko, oso pozik egongo dira etxegintzako enpresak, euskarari inolako lehentasuna eman nahi ez diotenak, polizi oro... Aldiz, utzi dituen zuloak nabariak dira: zerbitzu oso eskasak hainbeste etxe egin ondoren (kiroldegia eta igerilekua gainezka, kultur areto txukunik ez, musika eskola txikiegia, bidegorri sarerik ez, osasun etxea txikiegia, etxebizitza izugarri garestiak...) Baina deigarria izan da gizon honen zaletasuna obra ´faraonikoak` egiteko. Duela urte batzuk, Galarretan hipermerkatu bat egin nahi izan zuen (herriko merkatariak bere kontra jarriz); Santa Barbaran harrobiaren inguruko proiektu erraldoia egiteko asmoa, funikularra eta guzti; Ur-Parkea, tamalez, egitea lortu duena nahiz eta uraren kontsumoa ikaragarria izango den; Sagardoaren museoa, Astigarragan aurten bertan ireki dutenean halakoa... Hala ere, Rekondoren ibilbide politikoa ez da horretara mugatu. Urte guzti hauetan Gipuzkoako Foru Aldundian parlamentaria izan da eta beti Gobernu Batzordeko partaide, gainera. Bertan, bultzatutako proiektuak askoz kaltegarriagoak izango dira. Besteak beste, erraustegiarena, non bera eta bere alderdia bultzatzaile nagusiak diren, Abiadura Handiko Trena, etengabe handitzen eta itoko gaituen errepide sarea, Pasaiako kanpo portua eta abar. Hau da, eskuin-eskuineko politika egin du Joxan Rekondok. Ikusten duzuenez, nire uste apalean, Hernanik merezi ez zuen alkatea. Xabier Agirre