Gabonetako deskantsuaren ondoren, garrantzitsua zen asteburuan irabaztea eta are gehiago lehen posturako arerio baten kontra. Hernanik lanak ondo egin zituen eta Rekalde talde gogorrari 3-0 irabazi zion etxean. Markagailuak erakusten duena baino partidu estuagoa izan zen, lehen 2 jokoetan 25-22 irabazi baitzuten hernaniarrek. Bilbotarrak ez ziren partidua erregalatzera etorri eta joko bukaera artean berdin-berdin joan ziren, azken puntuetan Lauri Matiasen mutilek errematatzen asmatu bazuten ere.
Hernaniarrak lider
Larunbateko partiduaren ondoren, hernaniarrek lider jarraitzen dute eta gauzak patxadan eta ondo egiteko adina punturekin. Gainera, aurkari zuzen bat urrutiratzea ere lortu dute asteburu honetan, bilbotarrena ligako talderik gogorrenetakoa izan baita azken denboraldietan. Hernaniarrek bigarren buelta hasiko dute orain.