Oier Mendizabal pelotari hernaniarra 2garren mailako binakako txapelketan murgilduko da gaurtik aurrera. Belloso mendabiarra izango du bikote eta estreinako partidua gaur jokatuko dute, Arretxe II-Apraizen aurka, Galdamesko frontoian. 20:00etan hasiko den jaialdiko bigarren partidua izango da.
Bost bikote
Asegarceko txapelketan bost bikotek hartuko dute parte. Horien artean izango dira iazko bere bikotea, Retegi Bi, eta aurtengo lauterdian borrero izan duen Aratz Mendizabal, besteak beste. Bost bikoteek elkarren artean jokatuko dute ligaxka (urtarrila eta otsailean) eta bost horietatik lau final aurrekoetara pasako dira. Finala martxoaren 23an jokatuko da eta Asegarceko txapeldunak Aspeko txapeldunen aurka neurtuko dira martxoaren 30ean. ´Belloso bikote ona` Mendizabal IIak Kronikari esan dio ´ilusionatuta` hartzen duela txapelketa berria eta ´iazkoa hobetzen` saiatuko dela. Iaz Retegi Bi-rekin jokatu eta final aurrekoetara iritsi ziren. Aurten Belloso izango du aurreko koadroetan eta kontentu azaltzen da: ´Bikote ona jarri didate; sake ona dauka, bi eskuekin asko jotzen du eta asmatu ohi du errematatzen`. Gainera, badakite zer den, bikotea eginda, txapela buru gainean jartzea: ´Duela bizpahiru urte Lezamako txapelketa irabazi genuen, promesetan` dio Oierrek.
Gaur ´partidu gogorra`
Gaur partidu gogorra izango dutela dio atzelari hernaniarrak: ´Apraizek asko jotzen du eta ez da erraza izango bera dominatzea. Hori lortuz gero, Arretxeri IIri airea kenduko nioke, oso garrantzitsu izango dena`.