Wazemankeko aktoreek irekiko dute aurtengo txotx denboraldi ofiziala Hernanin, urtarrilaren 28an, eguerdiko 12:00etan. Hernaniko sagardo berria dastatzeko aukera izango da Plazan, eta txorixo pintxoak ere jarriko dituzte aukeran. Festa alaitzeko txaranga ibiliko da kalean barrena eta aizkolarien erakustaldia ere izango da. Berrikuntza moduan, Udaletxeko teilatutik ´kolore espektakulo bat` botako dutela jakitera eman du udalak. Sagardogileek, merkatari eta tabernariek eta udalak antolatu dute aurtengo txotx irekiera ekitaldia ´probaketaren betiko zentzua mantendu eta kontsumo arduratsua` bultzako duena.
Hamabi sagardotegi
Hamabi sagardotegi dira Hernanin ofizialki txotx denboraldi berriari ekingo diotenak: Alberro, Altzueta, Elorrabi, Goiko-Lastola, Iparragirre, Itxasburu, Larre-Gain, Olaizola, Otsua-Enea, Rufino, Zelaia eta aurten berriz irekiko duten Akarregi. Urtarrila-otsailean ireki eta apirilera arte egongo dira irekita sagardotegi gehienak, eta bolada horretan Hernanira jende asko inguratzea espero da, asteburuetan batik bat. Txotx denboraldian neurri bereziak hartzea erabaki du Txotx batzordeak: garbiketako langile eta Udaltzaingo gehiago ibiliko da herrian, tabernek plastikozko edalontziak emango dituzte eta Udalak publizitate kanpaina du egitekoa.
SagardoGuneari begira
Aurtengo txotx denboraldian herria girotzeko zenbait ekitaldi antolatu ditu Udalak eta etorkizuneko SagardoGunea bultzatzea ere helburu izango dute ekitaldi guzti hauek. Eperik zehaztu gabe badago ere, SagardoGunea Villa Ave Maria ondoan joango da eta Sagardo Naturalaren Enpresarien elkarteak eta Kalitatearen Kontseilu Arautzaileak egoitzak bertan izango lituzkete. Datorren asteburuan bertan performance bat egingo dute zenbait artistak, Hernani eta sagardoa gaiaren bueltan, eta irudi horiek postal bihurtu eta herrian banatuko dituzte neska-mutilek. Horrez gain, Sagarkorrika izeneko lasterketa herrikoia ere izango da sagardotegi eta kaleetan barrena eta kopla kantuan txotx denboraldia ixteko erronda ere izango da.