AZKEN hiru urteetan bezala aurten ere jostailuak biltzen aritu dira, Domiko ondoko lokalean, Perura bidaltzeko. 155 jostailu kaja bete bildu dituzte aurten, iaz baino gehiago. Kaja horietaz gain, bizikletak eta beste hainbat gauza ere jaso dituzte.
Erantzun ona
Jostailu bilketa Huancavelicaren lagunak izeneko gobernuz kanpoko erakundeak koordinatzen du. Hernaniz gain, Zestoa eta inguruko herrietan, eta Bilbon ere egiten dute bilketa. Hernaniri dagokionean, azaldu dute herriak oso ondo erantzun duela, eta hori eskertzekoa dela. Herriko komertzioaren erantzuna ere eskertzekoa dela aipatu dute antolatzaileek, ´denda batzuek arropa berri-berria eman digute, etiketa kendu gabea oraindik. Kortinak, jostailuak sartzeko kajak, kajak ixteko zinta eta beste hainbat gauza eman dizkigute`.
Proiektu ugari
Zestoan bizi diren Teodoro Sanchez eta Marije Gonzalez dira Huancavelicaren lagunak GKEko kideak. Jostailu bilketaz gain beste hainbat proiektu ere badituztela azaldu dute: komunidadeetan ura edateko moduan jarri, sukaldeak hobetu, jangela, eskolak, liburutegiak, nekazaritza, osasuna hobetzen lagundu, eta abar.