errege Magoek gaur bisitatuko dute Hernani, bertako haurrak agurtu, eta goxokiak eta opariak banatzeko. Nahiz eta Ekialdetik bidai luzea egin eta leher eginda iritsi herriko erdialdean buelta egingo dute, paje, artzai, dantzari eta musikaz lagunduta. Hernaniko haurrak ez dira gaurkoan goxokirik jan gabe geratuko, izan ere, 200 kilo goxoki prestatu dituzte karrozatik botatzeko. Kabalgata 18:00etan aterako da Marieluts aldetik eta Errege magoekin batean 75 haurrek hartuko dute parte. Txistulari Banda eta Musika Banda ere izango dira ibilbidea girotzen. Aurretik, arratsaldeko 15:00etatik 17:30etara, Zaharren Egoitza bisitatuko dute, urtero bezala.
Ibilbidea
Errege Magoen kabalgatak urteroko moduko errekorridoa egingo du aurten ere. Marielutsetik atera eta Elkano kalerantz abiatuko dira eta segidan Plazara abiatuko dira, bertan geldialdia eginda. Kardaberaz kaletik jaitsiko dira gero karrozak eta Cuevas farmazia parean berriro ere geldituko dira. Zinkoenean barrena Txirrita eta Urbieta kalera joango dira eta Guria taberna parean beste geldialdi bat egingo dute. Izpizua kalean behera Zinkoeneara joko dute eta Kale Nagusian gora abiatuko dira, Irizar tabernan geldituz. Plazara iritsi eta bertan egingo dute azkeneko geldialdia. Gedialdi bakoitzean bi dantzarik arin-arin eta fandangoa dantzatuko dute karroza gainean. Plazara iristen direnean jaiotzara hurbilduko dira erregeak. Haurren eskariak entzunda bukatuko da kabalgata. Gero etxera joango dira denak biharamuneko opariak ilusioz itxoitera.