HERNANIK 1 eta 0 irabazi zuen atzo Mutrikuren kontra Zubipen jokatutako partidua. Irabazi izanak badu meritua, baina jokalari bat gutxiagorekin irabazi izanak are gehiago.
Jokalari bat gutxiago
Arbitroak Hernani jokalari bat gutxiagorekin utzi zuen, aurreneko zatiaren 30garren minutuan. Hernaniko arduradunen hitzetan arbitroaren erabakia ez zen zuzena izan. Jokalari bat gutxiagorekin aritzeak, hasiera batean, taldea animikoki jota utzi zuen, baina taldea asko saiatu zen eta buelta eman zion ezinezkoa zirudien partiduari. Gola Imanol Arregik sartu zuen. Taldeko arduradunak oso pozik daude Hernanik atzo erakutsi zuen mailarekin, eta lortutako 3 puntuak ere primeran etorriko zaizkio taldeari. Arduradunen hitzetan, garaipen honekin Hernani 2 edo 3garren postuan izango da sailkapenean. Taldea igoera fasean sartzeko aurreneko 4 taldeen artean egon behar du, beraz mailari eutsi beharko dio denboraldia bukatu bitartean.