Zer da gaurko kontzertuan entzun ahal izango duguna? Zer musika estilo lantzen duzue Iñaki Salvador laukotean?
Iñaki Salvadorren proiektu honek Te doy una canción du izena, Silvio Rodriguezen abesti batek bezala. Kantautore ezberdinek egindako abestiekin osatu dugu errepertorioa. Iñaki Salvadorrek aspaldian zuen idea buruan bueltaka eta elkar ezagutu genuenean, aurrera ateratzea erabaki genuen. Aurreneko emanaldia Lesakan egin genuen 2004ko San Joan bezperan. Errepertorioan sartu ditugu Iñaki Salvadorri barruak mugitzen dizkioten abestiak. Gaurko kontzertuan, esaterako, entzun ahal izango dira: Joan Manuel Serraten Meditarraneo; Pablo Milanesen De qué callada manera; Benito Lertxundiren Bizkaia Maite; Chick Corearen You’re everything; Mikel Laboaren Txoria Txori; eta Loa loa kantu herrikoia.
Hala ere abestiak ez dira bere horretan mantendu, ezta?
Abesti guztiak moldatuta daude. Batzuetan melodia oso agerikoa da, baina beste batzuetan ez. Jazz eta musika latinoaren kutsua dute moldaketa batzuek. Beste batzuek badute halako misterio kutsu bat, Bizkaia maite abestiak esaterako. Abesti hau berezienetariko bat da niretzat. Nik, hala ere, abestiaren berezko melodiari eusten diot, ez dut asko inprobisatzen. Kasu honetan inprobisazioa eta moldaketak gehiago dira musika instrumentuen lana.
Beste proiektu batzuetan ere bazabiltza, ezta?
Musikeneko ikasketak bukatzeko talde bat osatu beharra dago eta errepertorio bat prestatu. Ainara Ortega Quartet proiektua antolatuta genuen horretarako, eta dena montatuta zegoenez, aprobetxatu egin dugu eta emanaldiren bat edo beste egin dugu. Errepertorioa jazzeroagoa da eta hizkuntza ezberdinak nahasten dira. Donostiako Jazzaldirako aurkeztu dugu taldea, ia aukeratzen gaituzten. Vaiven producciones-ekin ere haurrentzako antzerki-musikal bat osatzen ari naiz. Martxoan hasiko gara entsaiatzen. Te doy una canción proiektuarekin gainera, dena ondo badoa, diskoa grabatuko dugu.
Musikeneko ikasketan bukatu eta titulua lortu duzu beraz...
Bai, ikerketa lan bat aurkeztea besterik ez zait falta. Ikerketa Ella Fitzgeralden eboluzio estilistikoari buruzkoa egiten ari naiz. Osatu genuen taldeareakin egin genuen emanaldian ohorezko matrikula jarri zidaten. Esan daiteke Musikeneko jazz titulazioa lortzea nahiko berritzailea dela, izan ere jazz departamenduko aurreneko promoziokoa naiz. Estatu mailan ere ez dago jazza lantzen duten goi mailako eskola askorik: Kataluniako ESMUC eskolak aurten izan du aurreneko promozioa eta Iruñean ere badago beste eskola bat, baina Musikene baino urte bete gehiago besterik ez daramaki martxan. Hernanin badago beste musikari bat Musikeneko promozio honetan lizentziatu dena: Alejandro Soriazu, Satxa, pianojolea.