Etzi, larunbata, Errapia festa antolatu dute Zikuzulon, laugarren urtez. 11:00etan hasiko dituzte ekintzak eta gauerarte ez dute etenik izango.
Bezperan, aperitiboa
Karboneran
Festa bihar hasiko da, 20:30etan, Karboneran, Jon Zabaleta Errapiako kidearen bideo emanaldiekin. Bertan Ertzetatik 30 minutuko bideoa jarriko dute, iazko Errapia festari buruzkoa. Horrez gain, Egiaren makina eta Beldurrez blai lanak, 8 eta 6 minutukoak, ere jarriko dituzte. Hiru lanak aurten egin ditu Zabaletak eta larunbatean ere Zikuzulon jarriko dituzte.
Errapia festa ekintzez lepo
11:00etan haurrentzako zirko tailerra izango da eta 12:00etan graffitiak margotzeko ordua izango da. 14:00etan indarrak berrituko dituzte txistorra, tortila eta abarrekin. 17:00etan antzerki eta poesia esketxak izango dira, 18:00etan Adarragako txokolatada eta 19:00ak aldera proiekzioak emango dituzte horretarako prestatutako gela batean. Gaua Gizajo Terminalek, DJ Waterparties-ek eta Kosek girotuko dute, beren musikarekin.
Egun osoan zehar argazki eta pintura erakusketa bat eta Errapiako egileen lanak ikusgai izango dira.