Hernani K.E. saskibaloi taldeak denboraldiko lehen garaipena lortu zuen atzo kiroldegian Ordiziaren aurkako partiduan 76-57. 4garren jardunaldiraino itxaron behar izan dute hernaniarrek lehen garaipena lortzeko, aurreko hiru partiduak Zarautz, Iraurgi eta Askatuaken aurka galdu ondoren.
Lehen bi laurdenetan, jokoa mendean
Ibon Ocaña entrenatzailearen esanetan, lehen bi laurdenetan oso ondo aritu ziren hernaniarrak, bai erasoan eta bai defentsan jokoa menderatuz. Horren erakusle da deskantsura 23 puntuko abantailarekin iritsi izana. Ondoren hernaniarren maila jaitsi egin zen apur bat, baina markagailuari eustea lortu zuten.