JOSEBA Tapia soinu jole lasartearrak Real Politik disko berria kaleratu du, oraindik salgai jarri ez badute ere. Bihar izango da aurkezpen kontzertua, Andoaingo Bastero kulturunean, arratsaldeko 20:00etan. ´Doinu zahar nahiz berriak, bertakoak eta kanpokoak, jasoak eta sortuak...` eta ´bertso zaharrak eta letra berriak` biltzen ditu diskoak. Joseba Tapia soinu jolearekin batean Jexux Aranburu ereñotzuarra ere oholtzan izango da gaur, pianoa eta soinu haundiarekin. Hirugarren musikaria Arkaitz Miner da mandolina eta piano jolea.
´Gezakeria urruntzeko`
Real Politik-ek ´posiblearen politika` esan ohi dena adierazi nahi du, diskoaren aurkezpenak dioenez, ´utopiak ahaztu eta egin litekeena egiten bakarrik ausartzen dira gure politikariak` nabarmendu du. ´Politika ez ote da ezinezkoa dirudiena lortzea?` galdetzen du. Aurkezpenak berak erakusten du piper puntua dakarrela disko honek ´baina ez ahoa erretzeko, gezakeria urruntzeko baizik`. Joseba Tapiaren bakarkako laugarren diskoa da Real Politik eta Zakurraren biolina izeneko zigilu berriarekin argitaratu du. ´Izan ere tradizioak etengabeko bilakaeran dauka indarra: esateko eta musikatzeko modu berriak eragiten ditu munduak; egunero dago zer kantatu bat`.