KONTRABANDOA, gizon proba, lokotxa biltzea, sokatira, txinga eta abar izan zituzten atzo Atsegindegira hurbildu ziren umeek. Edozein begira jartze hutsarekin nekatzeko adina proba izan zituzten, baina, hala ere, umeei ez zitzaien neke gehiegi antzematen aurpegian, gehienek irripar batekin edo algara bizian egin baitzituzten proba guztiak.
Aisia programa
Atzoko ekitaldia Ongintza patronatuko Aisia programaren barruan antolatu zen. Programa honetan, umeek aisialdi denboran egiteko hainbat ekintza ezberdin egiten dituzte, eta atzokoan herri kirolen txanda izan zen. Arratsaldeko 16:30etan hasi ziren probak eta ordu horretan ume gehiegi hurbildu ez bazen ere, pixkanaka-pixkanaka talde dezentea bildu zen eta arratsalde pasa ederra egin zuten bertaratu zirenek. Azkenean, denak garaile.