Askatasunak antolatutako Amnistiaren aldeko II. futbol 7 txapelketa jokatu zuten herenegun Zubipen eta jende asko jaitsi zen, bai jokatzera eta bai eguna paseaz, jokalariak animatzera. Gutxi gora behera, 270 pertsonek jantzi zituzten galtza motzak, 27 taldetan banatuta, eta beste asko, zelaiz zelai ibili ziren, partiduak ikusi eta pintxoak jaten, aldarte onean. Bazkarirako 300 bat lagun bildu ziren, inprobisatutako aterpean. Horrelakoetan emaitza gutxienekoa da, baina ez dago soberan aipatzea Ibarrako Gazte asanbladak eskuratu zuela txapelketa, Skakeo hernaniarrei finalean irabazita, 1-0. Antolatzaileak gustora daude jendeak emandako erantzunarekin eta izandako giro ona azpimarratu zuten, nahiz eta baten batek mina hartuta bukatu zuen txapelketa. Eskerrak eman nahi dizkiete CD Hernaniri eta lagundu duten guztiei, beren borondateagatik.
Kontzentraziok jarraitzen dute
Askatasunak gogoratu nahi die herritarrei ostiralera arte kontzentrazioak egiten jarraituko dutela Iñaki De Juana preso donostiarraren egoera salatzeko. De Juanak 51 egun beteko ditu gaur gose greban, eta ospitalean gogoz kontra elikatua izaten ari da. Askatasunak nabarmendu nahi du presoak bere borroka jarraitzen duela eta herriak erantzun behar duela horren aurrean. Kontzentrazioak Zinkoenean izango dira, 18:00etatik 20:00etara.