prentsa ohar batean, Bildu Hernani plataformak errausketaren aurkako jarrera adierazi du berriro ere eta herritarrak Errausketarik ez! lemapean egingo den manifestazioan parte hartzera deitu ditu, larunbatean, arratsaldeko 18:30ean, Plazan. Bere oharrean plataformak dio, Landarbason edo Zubietan, ´Foru Aldundiaren inposizioak` berean jarraitzen duela eta errausketaren kalte eta arriskuen larritasuna ez dela gutxitu horregatik, ´kutsadura, osasun arazoak, isurketa toxikoen arriskuak... arazo horiek guztiak Zubietan mantentzen dira. Erraustegia ez da konponbidea, arazoa baizik`. Oharrean Hernaniko EAJ-PNV eta EAko zinegotzien jarrera salatzen dute: ´Alde batetik, errausketaren aurka azaldu dira, baina, beraiek dira Foru Aldunditik erraustegia inposatu nahi digutenak`. Eta galdera bat luzatzen diete: ´Zer gertatzen da, Landarbason hain kaltegarria denak, Zubietan ez duela kalte eta kutsadurarik sortzen?`. Bildu Hernanik, Gipuzkoako instituzioen jarrera ere gogor salatu nahi izan du: ´Hondakinen tratamenduan ez dute aurrerapausurik eman. Hondakinen eta zabortegien gaia usteltzen utzi dute, alternatiba oro baztertuta, eta orain errausketaren erabakia inposatu nahi digute. Herritarrok ezin dugu onartu EAJ-PNV eta EAk zuzendutako Foru Aldundiaren txantajea`.
´Alternatibak badaude`
BHren ustetan, hondakinen tratamenduan badaude alternatibak eta eman beharreko urratsak azaltzen ditu: ´Lehendabizi, hondakinen sorrera murriztea; bigarren, ahal dena berrerabiltzea; hirugarren, berrerabili ezin dena birziklatzea; eta, laugarren, berrerabili edo birziklatu ezin den guztia energia bihurtzen saiatzea`. Ondoren jakinarazten dute hondakinak trata-tzeko zein bide hartuko luketen: ´Biometanizazioa eta konpostajea da gure hautua. Bartzelona edo Kanadan bide hau hartu dute eta, urrutira joan gabe, Araban ere biometanizazioaren aldeko hautua egin dute eta hondakinen %70-80 erraz berreskuratu daitekeela erakusten du beren esperientziak. Bide horretatik doa gure apustua`. Azkenik, larunbatean, Hernaniko kaleetan egingo den manifestazioan parte hartzeko deia luzatzen dute.