Astigarragako Santioak bukaera izan zuten atzo, Santa Ana egunean. Foru plazan programa zabala burutu zuten egun osoan zehar eta sagardo dastaketa eta herri kirolek bildu zuten jende gehiena. Sokamuturrarekin hasi eta dantzaldiarekin bukatu... izan zen zer ikusia.
Eguerdian sekulako giroa
Eguerdi partean jendetza bildu zen Foru plazan sagardoarekin zintzurra bustiz idi dema ikusteko. Bitartean Unai Iturriaga eta Aitor Mendiluze bertsotan entzuteko parada ere izan zuten bildutakoek. Udaletxeko arkupetan artisauen eta sendabelarren erakusketa izan zen goiz eta arratsaldez. Idi apustuan Matxain, Irarreta eta Loinaz ibili ziren, bakoitza bere idi parearekin. Garaile Matxain atera zen, 45 plaza eginda, Irarretak baino bi eta Loinazek baino hiru gehiago. Aranon ere jaiak bukaerara iritsi ziren atzokoan.