Uztailaren 16a da Karmen eguna, eta Kaxkoan festa izango da, goizetik gauera. Aurten, Xanti Lujanbiori emango diote Alkate makila, bere etxe aurrean, Andre Kale 62an. Bestalde, Karmen jaietan omenaldi berezia egingo zaie Agustinatako monjei, aurten etorri baitira ostera ere Hernanira. Bi omenaldi horiez gain, festarako egitarau zabala antolatu dute goizeko 09:00etatik iluntzera arte, besteak beste, trikitixa, balkoi lehiaketa, karta jokoa, gaztelu puzgarri, txokolatada eta sardin janarekin.
Zapiak eta banderolak
Festak girotzeko zapi eta banderolak atera ditu Kaxko auzo elkarteak festetako logotipoarekin. Zapiak 3 eurotan salduko dituzte eta Banderolak 5 eurotan. Mikel Lujanbiok salduko ditu Eroski Bidaiak ondoan, Kale Nagusian, bihar eta hurrengo aste osoan.
Bazkari txartelak salgai
Karmen jaietan herri bazkaria izaten da urtero-urtero Plaza Berrin eta ohitura onak ez galtzeko, aurten ere antolatu dute. Txartelak salgai daude 15 eurotan, Haizea korseterian, Peña janari dendan eta Jaione Konjelatuetan. Horrez gain, Mikel Lujanbiok ere salduko ditu.