SAgastiyako etxebizitzen auzian Bildu Hernanik egindako adierazpenei erantzun die Iñaki Arratibel Hirigintza Zinegotziak, Kronikara bidalitako prentsa ohar batean. Arratibelek dio BHk ´beste alde batera begiratzen duela` eta ´Batasuna gobernuan egon zen garaian egindako hirigintza jarduera okerrak direla eta` ezker abertzaleari dagozkion ardurak ekiditen dituela. Hirigintza zinegotziak galdetzen du ´Eusko Jaurlaritzarekin dagoeneko sinatua zegoen hitzarmen bat` zergatik aldatu nahi izan zuten galdetu izan diotela BHri, baina, ez duela erantzunik ematen. Arratibelen arabera, Batasunak sinatutako hitzarmen berri hori da ´Sagastiyako etxebizitza guztien izapidea baliorik gabe utzi duen epaia ekarri duena eta ondorioz, inguru horretan babestutako etxebizitza bat ezartzeko itxaroten ari ziren ehunka hernaniarren itxaronaldia luzatu dutena`. Gainera, ´Batasunaren gobernuak` aurrera eramandako jardueraren arduradun Foru Aldundia, Eusko Jaurlaritza eta egungo Udala egiten dituela salatu du.
Akatsak onartu
Hirigintza zinegotziaren hitzetan udal gobernuak erratu litezke, ´baina akats bat egindakoan, akatsa onartu eta hark ekarri dituen ondorioak pairatzen dituztenei barkamena eskatzea ona da`. Bere ustez BHk onartu egin behar du ´hanka sartu zuela eta aldatutako hitzarmen baten bere sinadura jartzeko nahi horrek Sagastiyako etxebizitzen atzeratzea ekarri duela beste behin`.
Atzera pausoa
Hirigintza zinegotziak nabarmendu du gaur egun hernaniar askorentzat arazorik larrienetako bat dela etxebizitzarena eta ezker abertzaleak, gobernuan egon den urte guztietan ´gai honen inguruan aurrera pauso zurrunik ez emateaz gain, tamalez, eman duen bakarra atzera pauso bat` izan dela. ´Arrazoizko prezio bateko etxebizitza bat behar duten ehunka familia eta gazte hernaniarrek gai honen inguruko azalpen bat merezi dute, eta ez gainerakoei errua botatzeko ahalegin bat`, Arratibelen arabera.