Hitzak egiten gaitu ezer, bertsoa eta bertsolaritzari buruzko erakusketa egongo da gaurtik maiatzaren 5era Biteri kultur etxean. Erakusketak parte desberdinak ditu: bertsolari zahar eta gazteen arteko lehia azaltzen duten lau panel haundi; bertsoak entzuteko aukera; bertsolaritzak publizitatean izan duen lekua azaltzen duen gunea; pantaila bidezko jolas interaktiboak; sei minutuko film laburra; eta zenbait osagarri estetiko, besteak beste. Erakusketarekin batera bisitatzen duten ikastetxeetako ikasleentzat material didaktikoa ere bada.
´Bertsorik gabeko euskal herria...`
Antolatzaileen hitzetan, hipotesi hau hartu dute erakusketa antolatzeko abiapuntu eta horrekin bertsoak ekarri duenaren katalogazio bat egin dute; alegia, bertsoa galduta zer galduko litzatekeen. Diotenez, bertsoak paper sozial bat betetzen du eta bertsoa behin kantatuta herriarena edo entzuleena bihurtzen da. Erakusketa arratsaldeko 18:00etatik 20:00tara izango da ikusgai Biterin, astelehenetik ostiralera.