Atsegindegin 30 kotxerentzat garajeak salgai daude oraindik ere

JOSE Antonio Cuestak, Herri Lan Zinegotziak, atzo prentsaurrean azaldu zituen bukatu berri den Atsegindegi plazaren inguruko xehetasunak. Zinegotziak azaldu zuenez, oraindik ere 30 garaje plaza daude salgai Atsegindegin. Prezioaren inguruan galdetuta zinegotziak esan zuen 18.000 euro inguru balio duela plaza bakoitzak eta trukean 75 urterako kontzesioa ematen du enpresak. Guztira 150 eta 170 garaje artean izango dira Atsegindegin, 3 solairutan banatuta. Kopurua dagoen eskariaren arabera moldatuko dute. Garaje hauek erabat itxita daude eta pasa den abendutik ari dira erabiltzen. Kostua igo Cuestak esan zuen plaza eta garajeak hasiera batean aurrikusten zena baino kostu haundiagoa izan dutela. Hasierako 900.000 euroko kostuari beste 240.000 euro gehitu behar izan dizkiote (guztira 1.140.000 euro). Izan ere egiten hasi zirenetik altzairuaren prezioa izugarri igo da eta hori da igoeraren arrazoia. Plaza estalia Plazari buruz Cuestak azaldu du herriko aurreneko plaza estalia dela eta herritarrek eskertu egin dutela, hainbat ekitaldi egiteko primeran etorriko delako. Plazak 1.000 m2 -ko azalera du eta akzesibilitate neurriak betetzen ditu.