18/98+ plataformak atxikimenduak bilduko ditu hilaren 18ko manifestaziorako

18/98+ plataformak batzarra egin zuen joan den ostegunean Biterin eta bertan herriko sektore ezberdinetako hainbat eta hainbat eragile bildu ziren. Osteguneko batzarraren helburua zen bertaratu zirenei 18/98 sumarioen inguruko informazioa ematea, eta gaur egun epaiketak zein egoeratan dauden azaltzea. Ikuspuntuak Elena Beloki eta Mikel Korta izan ziren hizlari Biterin. Azkeneko honek azaldu zuenez ´hankasartzea litzateke epaiketa hauek soilik ikuspuntu juridikotik begiratzea, politikoak baitira`, bere ustetan ´eraikuntza nazionalean` aritzen diren mugimenduak ´mozteko` saiakera bat dira 18/98 sumarioak. Horretaz gain, Kortak esan zuen kontua ez dela ´elkartasuna` adieraztea sumarioan inputaturik daudenekin ´jomuga denak gara eta ez bakarrik ezker abertzalea`, argitu zuen. Bukatzeko Xaki kasuan inputaturik dagoen Kortak ´arriskua` ikusi zuen epaiketak ´zirko` gisara soilik hartzea: ´fribolitaterako eta desmobilizaziorako joera ekar dezake horrek, ‘zirko’ horiengatik milaka pertsona espetxeratu dituzte herri honetan 30 urtetik hona`, esan zuen. Manifestaziorako atxikimenduak Elena Belokik datozen egunetarako mobilizazioen berri eman zuen. Alde batetik gogoratu zuen datorren larunbatean manifestazioa izango dela Bilbon eta horretarako atxikimenduak biltzen ari direla Hernaniko sektore ezberdinetan, e-mail helbidea ere eman zuen atxikimenduak jasotzeko (hernani1898@euskalerria.org). Manifestaziora joateko autobusak jarriko dituzte Hernanitik. Horretaz gain, mahaiak jarriko dituzte materiala saldu eta epaiketaren gastuak kubritzeko ´epaiketa honek ekarri duen beste arazo bat hori izan baita`, esan zuen Belokik. Ostegunero Biterin 18/98+ plataformak talde bat sortu du Hernanin eta ostegunean azaldu zutenez astero biltzen dira, ostegunez Biterin, plataformaren ekimenen inguruan lan egiteko. Herritar guztiak gonbidatu zituzten lan taldean parte hartzeko.