EREÑOTZUKO Basterrola etxean bizi direnek, Kronikara bidalitako idatzian
jakinarazi dute gaur deklaratzera deituta daudela Donostiako epaitegira.
Adierazi dute iazko urrian Ertzantzak etxera joan eta identifikatu ondoren,
bigarren aldiz denuntziatu egin dituztela.
2.000 urtetik okupatuta
Ereñotzuko Basterrola etxea 2.000 urtean okupatu zuten: ´etxea okupatu
genuenean sabaia apurtuta zuen eta uraren eraginez, sukaldea txikituta zegoen.
Etxea giza zein saguen zikinkeriaz beteta zegoen. Ustezko jabeak ez ziren inoiz
etxera joaten eta ez zuten etxea inoiz etxea garbitzen`. Diote etxebizitza
utzita zegoela eta beraiek txukundu ez balute gaur egun Basterrola Urumea errio
ondoko beste hondakin bat izango litzatekeela. Horren adibide dira Ereñotzuko
zentrala edo Epele-Etxeberri jatetxea, duela bi hiru urte ´hondakin bihurtu
direnak` gaineratu dute.
Etxearen egoera legala
Etxearen egoera legalari buruz diote: ´Basterrola hasiera batean, ilegalki
abereak gordetzeko eraiki zen eta geroago etxebizitza bezala egokitu zen. Jabeek
soilik lurraren salerosketa kontratua dute (1925ekoa) eta bertan ez da
etxebizitzarik azaltzen`.
Azaldu dutenez, lur horien eroslea ez da bizi eta bere familia da orain lurren
jabea: ´senideetako batek salatu gaitu eta bigarren aldia da, usurpazio
akusazioarekin salatu gaituela`. Lehenengo salaketari buruz diote Donostiako
epaitegiak 2002garren urtean artxibatu egin zuela ´etxearen jabetzaren inguruko
froga nahikorik aurkeztu ez zutelako eta salaketa ez zuelako kontratuaren
sinatzaileak jarri` azaldu dute idatzian.
Lurra salgai
Basterrola etxea eta terrenoa salgai daude gaur egun 20 miloitan, idatziak
dioenez: ´jabeek lur horiekin espekulatu nahi dute. Lurra berez oso erakargarria
ez denez etxeak ematen dio balio bakarra. Baina horretarako hutsik egon behar du`.
Diote beraiek direla etxea zutik mantendu dutenak eta ez dutela utziko beren
´lanarekin espekulatu dezaten`. Azpimarratu dute auzotar gehienek arrazoi ematen
dietela eta berentzat irtenbide bakarra gune berri bat okupatzea izango dela,
baina bitartean etxeagatik borrokatzen jarraituko dutela.