EROSKIK Agustinatan irekitzekoa duen denda berria aurkeztu zuen atzo
prentsaurrean, Biterin. Otsailaren 8an izango da irekiera, baina, inaugurazio
ekitaldia otsailaren 7an dute egitekoa, datorren asteartean, 19:00etan.
Hernaniko denda berriak 1.000 metro koadroko azalera izango du eta 5.000
produktu. Okindegiko produktuak, txarkuterikoak, harategikoak, arrandegikoak,
fruterikoak, zerbitzu librekoak, esnekiak, ultramarinoak, drogeria eta edariak
izango dira. 5.000 produktuetatik 1.000 eroski markakoak izango dira.
Ordutegia, berriz, goizeko 09:00etatik 21:00etara izango da.
Hogeita hamar langile
Hernaniko Eroskik 30 langile izango ditu, Hernani ingurukoak gehienak, atzo
prentsaurrean esan zutenez. Egindako inbertsioa berriz, 2.100.000 eurokoa izan
da. Juan Martin Martinez, Gipuzkoako supermerkatuetako buruak atzo esan zuenez,
Eroskiren helburua da herriko ekonomiako parte izan eta herrian kooperatzea.
Irekieraren inguruan antolatutako ekitaldien barruan, familiaren eguna egingo du
otsailaren 4an Eroskik, Atse-gindegi plazan. Bertan gaztelu puzgarriak, pelota
etxeak, ludoteka eta abar izango dira neska-mutilentzat, 10:00etatik 14:30etara.
´Bezeroa da protagonista`
Atzo herritar eta agintariekin ekitaldi bat egin zuen Eroskik eta bertan
Bernabe Tierno psikologo famatuak hitz egin zuen. Bere hitzetan, Eroskin bezeroa
da protagonista eta supermerkatuetan bere etxean dagoela uste du jendeak.
Azpimarratu zuen Eroskik ateratzen duen aldizkaria eta baita beren irabazien %
10 akzio sozialean inbertitzea ere.