Borroka sutsua izan zen atzo Landaren, zuzeneko arerioak diren bi talderen artean. Hernanik lortu zuen azkenean, urteko helburua; Bartzelonari 15 eta 7 irabazita, ia-ia lortua dauka Ohorezko Mailan mantentzea.
Parez pare, ia partidu osoan
Bi taldeek beharrezkoa zuten garaipena atzo, jaitsiera postuetatik libratzeko. Gauzak horrela, nabariak ziren tentsioa, eta irabazteko grina. Hernani ondo hasi zen, 3 eta 0 aurreratu baitzen markagailuan, 20garren minutuan Anartz Elosegik lortutako zigor kolpe batekin.
Baina lokatzez blaitutako eskuetan baloiak nola, halaxe egin zien irrist aldeko zorteak lau minutu geroago; Bartzelona aurreratu zen 3 eta 7, entsegua eta haren gauzatzearekin.
Erasoa eta defentsa, orekatuta
Hernanik ez zuen, ordea, ezer oparitzeko asmorik. Bigarren denboran, 47 minutuan, Jon Otxotorenaren entseguarekin aurrea hartu zuen, 8 eta 7.
Tentsioak gora egin zuen, eta lokatzak zaildutako zelaian min hartu zuten bi jokalarik; Bartzelonako batek eta Hernaniko Jon Insausti, Intxetak. Sustoa pasata, nor bere kabuz atera zen zelaitik, eta partidua bukatzeko 12 minuturen faltan, Oier Garmendiak luze botatako baloiari esker, entsegu lerroan zen berriro Hernani. Bartzelona baloia urruntzen saiatu zen, baina Jon Ander Puertasek blokeatu eta entsegua lortu zuen. Anartz Elosegik gauzatu, eta 15 eta 7 jarri ziren aurretik, markagailuan.
Handik aurrera, Bartzelona saiatu zen, baina Hernanik ikaragarrizko lana egin zuen defentsan, eta bonus punturik ere ez zion opartiu arerioari.
Quesos eta Ciencias
Garaipen honi esker, Hernanik atzean utzi ditu Getxo, Bartzelona eta Ciencias, eta salbatu da ia. Datorren asteburuan arerio gogorra izango du; VRAC. Eta azkenekoan, Ciencias, Landaren; matematikoki jaitsita izango da, seguru asko.