Mujika eta Ormazabal Azpeitian, finalean

Goizeko 11:00etan hasita, Gi­puz­koako Bertsolarien Esko­lar­teko Txapelketako finala jokatuko da gaur, Azpeitiako Soreasu antzokian, eta bertan izango dira Hernaniko Bertso Eskolako Iker Ormazabal eta Andoni Mujika. Era berean, finala bukatuta, Bertso Es­kolen Egunari emango diote jarraipena.

Zortzi bertsolari gazte, gaurko finalean
Otsailean hasi zen Eskolarteko Txapelketa. Gipuzkoan bost kanporaketa jokatu dira Le­gaz­pin, Lasarten, Oñatin, Al­tzon eta Orion, eta gaurko fi­na­lera pasa dira, Andoni Mu­jika eta Iker Ormazabal her­na­niarrekin batera, Urko Arregi, Libe Goenaga, Oihana Arana, Jokin Irastorza, Ane Beloki eta Itziar Mendia.
Gaurko txapeldunak eta txa­peldunordeak Euskal He­rri­ko Eskolartekoan kan­ta­tze­ko aukera izango dute, ekai­na­ren 10ean, Saran. Azken saio horretarako sailkatuko di­ren gainontzeko bertso­la­ri­ak zein diren aurreago jakingo da. Izan ere, Nafarroako finala ere gaur jokatuko da, baina Ara­bakoa, hilaren 13an; La­pur­di, Behe Nafarroa eta Zuberoa­koa maiatzaren 20an; eta Bi­z­kaiakoa ekainaren 3an.

Finala jokatuta, Bertso Eskolen Eguneko festa
Gaurko eguna Gipuzkoako Es­ko­larteko Finalarekin hasiko ba­da ere, zer ospatu gehiago izango da.
Behin txapelketa bukatuta, Azpeitiako plazan elkartu eta Bertso Eskolen Egunari eman­go diote segida.
Elkarrekin bazkaltzeko au­ke­ra izango dute ber­ta­ra­tu­ta­ko­ek, eta horrez gain, baz­ka­lon­dorenerako hainbat jolas eta tailer antolatu dira: jola­sen gunea, bertso mu­sika­tue­na, eskulanena, jolas eta sor­me­nerako antzerkiarena... Egu­nari bukaera emango dion azken ekitaldia, arratsaldeko 16:30ak aldera izango da, plazan bertan.