Ergobiako errumaniar kanpamenduak bizi ziren azkeneko sei familiak agurtuko ditu Astigarragak datozen egunetan. Hala jakinarazi du, hain zuzen, Astigarragako Udalak prentsa-ohar baten bitartez.
Asteartean uko, proiektuari
Bertan azaldu dute: «Aste Santua baino lehen egingo dute buelta beraien herrialdera beren borondatez gizarte-hezkuntzarako esku-hartze proiektuari uko egin ondoren. Proiektu horretara atxikitu ziren gure herrian bizi ahal izateko». Udalak dioenez, astearte honetan bertan sinatu dute ofizialki proiektutik ateratzea.
Era berean, «zorte ona» opatu die Udal gobernuak buelta honetarako.
51 familia, hasieran
Duela bost urte ezarri ziren aurreneko familiak Astigarragako kanpamenduan: «hasiera batean 51 familia finkatu ziren bertan, horietako 14 dagoeneko atera ziren, eta bizitza normalizatuak jarraitzeko gai dira», azaldu du Udalak.
Hasieran ezarritako daten arabera, kanpamendua uztailerako hustu behar zuten.
Urte hauetan zehar, «landu dituzte garbiketa eta osasun kontuak, alfabetatzea, lan formakuntza eta familia-egitura».
Gai horiek, hain zuzen, gizarte-hezkuntza esku-hartze programaren bueltan landu dituzte.
Esku-hartze programa 2012an jarri zuen martxan Romi Bidean elkarteak, Hernaniko Udalarekin, Gipuzkoako Foru Aldundiarekin eta Eusko Jaurlaritzarekin elkarlanean.
Proiektuaren helburua zen «bertan bizi ziren kideen autonomia pertsonala sustatu eta babestea, baita inguruan gizarteratzea ere».
Hasieran ezarritako daten arabera, kanpamendua uztailerako hustu behar zen, beraz, aurreikusi baino lehen gertatuko da.