Ligako txapeldun eta Kopako azpitxapeldun izan berri zarete. Balentria.
Senior bezela bigarren urtea izan da niretzat. Pasa den urtean pixka bat hasi nintzan entrenatzen talde nagusiarekin, minutu batzuk izan nituen, pausoz pauso joan naiz, eta aurten ezin naiz kexatu.
Ezin da gehiago eskatu, ezta?
Egia esan, ez. Hasieran minutu gutxi jokatzen nituen, baina denboraldia aurrera joan ahala, entrenatzaileak konfiantza gehiago izan du, eta puntuak lortu ditut (asistentziak gehi golak). Erdiko aurrelari edo eskuin hegal postuetan jokatzen dut. Finalean lehenengo gola egin nuen.
Izugarria izango zen...
Egia esan, markagailua irekitzea haundia izan zen. Bideoa ikusi dut etxean, eta oraindik nola sartu nuen galdera egiten diot neure buruari.
Aurreko urtean ere, gertu izan zenuten Liga irabaztea.
Pasa den urtean alderantziz izan zen. Liga bosgarren partiduan galdu genuen gure izotz pistan, Donostian. Aurten alderantziz izan da. Kopa gol batengatik galdu genuen eta Jacaren aurka izan dira partidu guzti horiek.
17 urte Txuri Urdinek, Ligako txapeldun izan gabe. Gogoa izango zenuen irabazteko.
Urte asko dira. Aurreko urtean gertu izan ginen. Presidentearentzat izugarria izan da, Rosa Zubeldiarentzat.
Noiz hasi zinen izotz hockeian jokatzen?
Bost urterekin hasi nintzen. Igande arratsalde batean, hiru urterekin, gurasoek izotz pistara ekarri ninduten patinatzera, eta engantxatuta geratu nintzen. Bertako eskolan hasi nintzen eta bost urterekin iritsi zen izotz hockeia edo artistikoa aukeratzeko hautua. Hockeia aukeratu nuen.
Zazpi urterekin, Madrilgo txapelketa batera joan nintzen jokatzera, eta hura izan zen nire lehenengo partidua eta torneoa.
Zure adineko gutxi izango zineten...
Ni izan nintzen lehenengoa garai hartan. 13 urte hauetan lagun haundiek utzi dute hockeia, ikasketak edota arrazoi desberdinengatik, eta orain jarraitzen duten gehienak hasi ziren zortzi, bederatzi edo hamar urterekin jokatzen.
18 urteko beteranoa zara, orduan.
Bai. Gure taldeko jokalari ia denak 18, 19, 20... urtekoak dira. Bi daude 29 eta 30 urtekoak, baina beste denak oso gazteak gara.
Hernanitik jendea animatzen al da izotz hockeia egitera?
Oraintxe bertan ez naiz hernaniar bakarra taldean. Aitor Martin ere taldean dago, bi hernaniar gara jokatzen ari garenak. Lehen lau ginen, Aitorren lehengusu bat eta Eneko, baina utzi egin zuten. Aitor ere sakrifizio haundia egiten ari da, Bilbon baitago ikasten.
Pasa den urtean Novi Saden egon zinan Espainiako selekzioarekin.
Hala da. Serbian izan nintzen, 20 urtez azpiko mundialean. Ez nuen espero, ni 18 urtez azpikoa naiz eta. Hala ere, deitu egin zidaten eta izugarrizko ilusioa egin zidan. 2015ean ere egon nintzen Novi Saden, baina 18 urtez azpiko munduko txapelketan. 2016an bi mundial jokatu nituen, Novi Sadekoa eta Madrilen 18 urtez azpikoa. Aurten ere jokatu dut, Logroñon, 20 urtez azpikoa. Hiru maila daude, eta Espainia bigarrenean dago, erdi erdian.
Izotz hockeian, alde haundiak daude herrialde batzutatik bestetara, ezta?
Frantzian oso maila altua dago, esaterako. Angeluko taldea lehenengo mailan dago, eta elitera igotzeko borrokan ibili da. Oso kilometro gutxitan gaude, baina maila oso desberdina daukagu. Profesionalak dira.
Gasteizen ere bada taldea.
Badaramazkite urte batzuk talderik atera gabe, diru arazoak direla eta. Urte jarraietan Liga eta Kopa ere irabazi zituzten, baina garai horretan hamar atzerritar edo zituzten, eta gaur egun lau atzerritarretara mugatu dute txapelketa. Egia esan, atzerritarrak kenduz gero, Espainiako hockeiak oraindik ere maila baxuagoa edukiko luke. Kanpoko jendeak Ligari, taldeari eta guri ere maila igotzen digu. Niretzako oso aberasgarria izan da Marcus edo Kellyrekin jokatzea.
Jendea joaten zaizue ikustera?
Orain bi urte arte, oso jende gutxi hurbiltzen zen, baina aurreko denboraldian Kopa eta Liga finaletara iritsi ginenean gorakada itzela izan zen. Ikusgarria, pasa den urtean gertatu zena. 700 pertsona sartzen dira, eta jendea zutik geratu zen. Aurten hori mantendu da, eta sarrera bikainak izan ditugu.
Etorkizunari begira zer?
Izan dut eskaintza bat Estatu Batuetako talde batean jokatzeko, baina lehendabizi ikasketak amaitu nahi ditut. Benetan gustatuko litzaidake Frantzian jokatzea. Baina esan bezala, aurretik ikasketak amaitu behar ditut.
Zein da zure doai nagusia?
Azkartasuna dudarik gabe.