Plenoa egin zuen Goizuetako Udalak, asteartean; eta hainbat puntu onartu zituen. Horietako bat da, eskatzaileen behin behineko zerrenda, Nekazaritza Politika Erkidearekin (PAC) erlazionatutako Herri Lurren Aprobetxamendurako. Eskatzaile guztiak onartu egin dituzte, eta orain, hamar egunez egonen dira ikusgai, udaletxeko tabloian.
Bi mozio, onartuta
Bestalde, bi mozio ere onartu zituzten, plenoan; biak ere, EH Bilduk aurkeztutakoak: alkate kurduei elkartasuna adieraztekoa bata, eta Guernica Gernikara izenburua duena bestea.
Aurrenekoarekin, salatu dute Turkiako gobernuaren jarrera autoritarioa, Kurdistanekiko errepresioa eta giza eskubideen urraketa areagotuz, 2016ko uztailaren 15eko estatu kolpetik, bereziki. Besteak beste, kritikatu du 50 herri kurdu baino gehiagotan, dekretu bidez kendu dituela kargutik, herriak aukeratutako alkateak, eta 39 kartzelan sartu ditu. Alkateei, elkartasuna erakutsi nahi izan die Goizuetako Udalak, mozio honen bitartez.
Eta bigarren mozioarekin, adierazi du Gernika dela kokapenik egokiena, Pablo Picasso margolariaren Guernica obrarentzako, Gernikako herriaren kontra 1937an egindako sarraskian oinarritutakoa. Uste baitu, «funtsezkoa» dela uztartzea «gertaera historikoa, artelana eta herria bera». Horregatik, eskaera formala luzatu dio Espainiako Gobernuari.
Korrikari 100 euroko laguntza, Udalak
Bestalde, Goizuetako Udalak jakinarazi du, 100 euroko diru partida bideratu duela Korrikara, laguntza gisa.