Oporrak Bakean programari esker, Tindufeko errefuxiatu kanpamenduetan jaio eta hazi diren 10-12 urte arteko haur sahararrek aukera izaten dute udaran bertatik ateratzeko, 55 gradutik gorako tenperaturak jasan behar ez izateko, ondo elikatzeko, osasun errebisioak egiteko, eta beraien auziaren difusioa egiteko.
Ume horiek basamortutik ateratzeko aukera izan dezaten, ordea, udako bi hilabetetan etxean hartuko dituzten harrera familiak behar dira, eta larunbata izango da izena emateko azken eguna.
Bueltan etor daitezen, 100 familiaren bila
Azken urteetan behera egin du udaran ume sahararrak etxean hartzen dituzten familien kopuruak, eta horrexegatik, aurtengo Oporrak Bakean kanpainaren leloa Bueltan da; bueltan etortzeko aukera izan dezaten, gutxienez, iaz etorritako haurrek.
Guztira, 350 umek pasa zuten udara basamortutik kanpo, iaz, eta aurten, horiek berriro hartzeko nahikoa familia lortzea da helburua. Horretarako, 100 familia gehiagok izena ematea falta da.
Larunbatera arteko epea
Izena eman nahi dutenen familiek, larunbatera arteko epea daukate.
Horretarako, edo informazio gehiago eskatzeko, udaletxeko lankidetzarako arlora jo daiteke: Aristazabal kaleko 7garren zenbakiko beheko lokalera (Plaza Feministara). Telefonoz ere deitu daiteke, 943 33 70 17 zenbakria, edo helbide honetara idatzi: marijo-m@hernani.eus.
Itziar Tomasena eta Iker Valle hernaniarrek Kronikari aitortu diote esperientzia ezinhobea izan zela iazkoa, eta aurten ere, etxean hartuko dutela Laila. Hernaniarrak gauza bera egitera animatu dituzte.