Herenegun hasi eta bihar arte, Joanes Larretxea eta Beinat Aginagalde hernaniarrak epaitzen ari dira, eta Hernaniko Sortuk prentsa oharrean salatu du «epaiketa testuinguru politiko kezkagarrian» datorrela. Era berean, «babesa eta elkartasuna» helarazi nahi izan dizkie bi hernaniarrei eta haien senideei; «konponbidearen norabidean lanean tinko jarrituko dugu».
«Batzuk bake justua lortzeko» lanean; «sufrimendua eta gatazka luzatzen» besteak
Hernaniko Sorturen esanetan, «gatazka politikoaren konponbidea eta Euskal Herriaren bake justua lortzeko alde bat ahalegin haundiak egiten ari da». Horren adibide, aipatzen ditu 2011ko urrian, Aieteko Nazioarteko Konferentzia eta hiru egunera «ETA erakundeak konponbiderako urratsak emateko prestutasuna, konpromisoa eta desioa agertu» izana; «armak alde batera» uztea; eta «apirilaren 8an, bakearen artisauek armagabetzea bururaino eramateko konpromisoa agertu» izana.
Era berean, azpimarratzen du «Beinat Aginagalde eta Joanes Larretxea gure herrikideak parte diren Euskal Preso Politikoen Kolektiboak hausnarketa egin eta konponbide prozesuari ekarpena egiteko» adierazpena kaleratu zuela.
Baina beste aldean, «gatazka eta sufrimendua luzatzeko etengabeko sabotaje zuzenak egiten eta oztopoak jartzen» ari direla salatu du Hernaniko Sortuk. Horren adibide jartzen ditu «armagabetzea ekidin nahian, Luhusoko azken operazioa» eta «errepresioa, indarkeria, atxiloketak...». Hain zuzen, salatu du; «espetxeak husten joateko garaia denean, espetxeratzeak edo espetxealdi luzapenak ematen» direla.
«Konponbide politikoa»
Hau guztia horrela, «hernaniar guztiok bakean eta aske izateko unera iritsi» dela azpimarratzen du, eta «gatazkaren jatorria politikoa denez, konponbide politikoa eskatzen» du. yy