Otxandion emango ditu aurreneko pausoak, gaur arratsaldean, 20garren Korrikak; eta asteartean iritsiko da Hernanira, goizeko 11:04etan.
Baina Korrika ofiziala iritsi baino lehen, lau Korrika gehiago ibiliko dira herrian barrena, bihar eta astelehenean.
Korrika Gaztea bihar, Tellerigainetik Plazara
Aurrenekoa, Korrika Gaztea izango da, bihar bertan. Tellerigainen hartuko dute lekukoa, eguerdiko 12:30etan, eta Plazan bukatuko dute ibilbidea, ordu erdi beranduago. Parte hartuko dute, Hernani BHI, Inmakulada eta Lanbide Heziketako ikasleek.
Plazara iristean, koreografia egingo dute, Korrikaren abestiarekin; eta Tilosetara mugituko dira gero, trikitilarien laguntzaz. Bertan izango dira, bertsolariak eta Lau Txori taldeko abeslariak.
Zita hirukoitza, astelehenean
Eta beste hiru Korrikak, astelehenean izango dira, Korrika ofizialaren bezperan. Aurrena, Mikro Korrika abiatuko da Haurreskolatik, 10:15etan; gero, Korrika Txikiak hartuko du lekukoa, 11:00etan Karobietako kioskoan, eta Langile, Txirrita, Urumea, Inmakulada eta Elizatxoko ikasleen eskutik, Plazara iritsiko da.
Dino Korrika, nobedadea
Eta azkenik, arratsalde partean egingo dute Dino Korrika, aurtengo nobedadea. 16:00etan abiatuko da, Sandiusterritik, adinekoen Korrika. Duina esan nahi du dino hitzak, eta hori da irudikatu nahi dutena: errespetua merezi duena. Izan ere, «Korrika berreskuratu eta bizirautea lortu zuen belaunaldia osatzen dute, bertan parte hartuko dutenek».
Kontxita Beitiak, Felipe Tellezek eta Sabino Iragorrik eramango dute lekukoa. Beitia izango da, gainera, Korrika ofizialeko omendua Hernanin: «dena da zoragarria Korrikaren inguruan, baina omendua izatea ikaragarria da, sekulako poza. Eta Dino Korrikarekin, lekukoa hartuta Plazan sartzean... badakit barrenak mugituko zaizkidala».
Tellezi ere, «oso ideia polita» iruditzen zaio Dino Korrika, AEKk eta Zerbitzu Sozialek elkarlanean sortu dutena. Ttapa-Ttapa ekimeneko boluntario da bera, eta uste du oso garrantzitsua dela adinekoak kontutan hartzea.