Bi zita garrantzitsu izango dituzte asteburuan Hernani eta Ereñotzuko bertsolariek.
Batetik, Gipuzkoako Herriarteko Bertsolari Txapelketan, Ereñotzuk final laurdenetako azken saioa izango du, ostiralean Ur Mian.
Bestetik, Andoni Mujika gaztea Gipuzkoako Eskolarteko Txapelketako finalean izango da, igandean, Azpeitian, Bertso Eskolen Egunean.
Irabazi beharra, final erdietara pasatzeko
Herriarteko Txapelketan ederki hasi zen Ereñotzu, eta erraz sailkatu zen final laurdenetarako. Baina fase honetako aurreneko saioan, lehengo ostiralean, galdu egin zuen 14 eta 10, Asteasu-Zizurkilen kontra.
Oraingo bertso saioa irekia eta doan izango da, eta ez afari baten bueltakoa.
Ostiral honetan, berriz, Ur Mian kantatuko dute Iñaki Zelaiak, Aritz Zerainek eta Arnaitz Lasartek, Oñatiko Txinparta 1 taldearen kontra. Saioa 22:30etan izango da, eta irekia, doan izango da, eta ez afari baten bueltakoa. Animoak beharko dituzte, irabazi beharra baitaukate.