Iturmendiko jentilzuloa, Txanpinoiaren kobazuloa izenarekin ere ezaguna, «Hernaniko ondare natural garrantzitsua» dela azpimarratu zuten atzo, Felix Ugarte espeleologia elkarteko lehendakari Txomin Ugaldek, eta Mikel Uzkudun eta Jon Ziganda kideek, argitaratu berri duten Mendi txiki baten istorioa liburu pedagogikoaren aurkezpenean. Izan ere, «sistema karstiko oso baten ezaugarri guztiak ikusi baitaitezke bertan, eskala txikian», azaldu zuten.
Hain zuzen, 10-12 urte arteko gaztetxoei zuzendutako liburuxka hau Hernaniko eta inguruko ikastetxeetako irakasleei helaraziko diete, eta nahi duenak Biterin ere eskatu dezake, dagoeneko.
Lau elementuak biltzen dituen lurpeko ingurunea
Aurkezpenean, Koro Etxeberria kultura zinegotziak eskerrak eman zizkion elkarteari egindako lanagatik, eta liburuxkaren enfoke pedagogikoa azpimarratu zuen.
Elkarteko kideen esanetan, «sistema karstikoaren berri modu pedagogikoan ikasteko aproposa da Iturmendi. Kareharria oso ohikoa da Euskal Herriko mendietan: Santa Barbaran, Ernion, Aralarren, Pirinioetan... eta gaztetxoek ez dute ulertzen 15km-tan nola funtzionatzen duen sistema karstikoak. Iturmendin, eskala txikian ikusi daiteke osorik: isurbidea, iturburua, lurpeko erreka. Gainera, Iturmendiren balioa oso haundia da, lau elementuak biltzen dituen lurpeko ingurunea baita: ingurune fisikoa (sistema karstikoa), biologikoa (errekuperazioari esker xaguxarrak itzuli dira), arkeologiko-paleontologikoa (aztarnak aurkitu dira), eta etnografikoa (kobazuloari lotutako kondaira gorde da).
Bisitatzeko egokia
Iturmendik daukan balioa dela medio, ikasleek kobazuloa bisitatu, eta interpretazio zentroa sortzeko aukera ere buruan darabilkite, «180 milioi urtetako historia eta gehiago gordetzen baita bertan; lurrak bizirik jarraitzen du».