Udal gobernu taldeak jakinarazi du legealdiko erronka nagusiaren aurrean daudela: «Herri Eskolak duen gela faltari behin betiko konponbidea aurkitu beharrari, hain zuzen».
Herri Eskolako zuzendaritzak bere kezka adierazi ondoren ekin diote erronkari: «datorren ikasturtean, izenemate berriek ikastolaren barne antolakuntza moldatu behar izatea eragingo dute», azaldu du Udalak. Gainera, adierazi dute, beste kontu batek are gehiago larritzen dituela: «bi ikasturte barru, ez da egongo espaziorik ikasle berrien eskaera osoari erantzuna emateko».
Udal gobernua konponbide ezberdinak aztertzen
Horrela, beraz, diote «2019-2020 ikasturtean, ez da lekurik egongo izena eman nahi duten 2 urteko ikasle berri guztiak hartzeko, beraz, EAJren Udal gobernua konponbide ezberdinak aztertzen ari da, gure herriko umeak lekurik gabe gera ez daitezen».
Horren aurrean, argi diote: «badirudi 4 edo 5 ikasturte izango direla ikastola kolapsatuko dutenak, baina Udal gobernuak arazoa behin betiko konpondu nahi du».
Baina konponbide definitiborako beharren txostena, eta Eusko Jaurlaritzaren dirulaguntza bermatu behar denez, aldi baterako soluzioaren bila dabil Udala: «epe baterako Lehen Hezkuntzako 6. mailakoak udal lokal batera lekualdatzea izan liteke konponbideetako bat, EAJren ustez». Eta diotenez, «Hezkuntza Delegaritzak begi onez ikusi du aukera».
Izan ere, «EH Bilduk egindako planifikazio okerra dela eta, Udal gobernu jeltzalea behartuta legoke zehaztugabeko epe batez barrakoiak onartzera». Dena den, «egoera hori inork nahi ez duenez, EAJk aipatutako behin behineko konponbide hori plantetuko dio bai Hezkuntzari, baita Herri Eskolako zuzendaritzari ere». Horrela, Udalak azaldu duenez, «Herri Eskola behin betiko kontsolidatuko duen proiektua egin bitartean, beraien haurrak Herri Eskolan matrikulatu nahi dituzten familia guztiek aukera izango dute, eta nagusienek duintasunez jaso ahal izango dituzte beraien eskolak».
«EH Bildu etengabeko inprobisazioan dabil ikastolako espazio falta konpontzeko»
«Haunditze obra ez da modu egokian egin»
Beste kezka bat ere badu Udal gobernuak: «legealdian EH Bilduk kudeatu zuen ikastolaren haunditze obra ez zelako modu egokian egin. Obraren kostua 1.171.490,75€ izan da guztira, eta kopuru horretatik Udalak %55a bere gain hartu behar izan du, berez zegokiona baino %15 gehiago. Izan ere, EH Bilduk ez zuen ondo koordinatu Eusko Jaurlaritzarekin dirulaguntza jasotzeko aurkeztu beharreko proiektua; hain zuzen, ikasketa-zentroak eraberritzeko edota haunditzeko ematen dena».
Eta orain ere, modu desegokian ari direla diote: «EH Bildu etengabeko inprobisazioan dabil ikastolako espazio falta konpontzeko. Gaitasun faltaren adierazle garbia da».