Ilegalizazioaren inguruan ez dago eztabaidarik. Hori gauza
jakina da. Behin eta berriro eman izan dut nere iritzia, era publikoan eta baita
pribatuan ere. Eskatutako bileran, agian, jarraituko dugu gaiaren inguruko
elkarrizketarekin.
Baina, horrek ez du egun hauetako eztabaida itzaltzen. Eta, nere ustez, 2006ko
Aurrekontuen inguruko eztabaidatik iheska dabil Bildu Hernani. Beren azken
oharreko 10 lerro hoiekin etzait iruditzen Udal aurrekontu eredu berri bat egin
litekeenik. Eredua egiteko okasio ederra aurreko legealdian izan zuten. 1999ko
promesak ere halakoxeak ziran: babeseko etxebizitza politika egin nahi, baina
eskas; arlo sozialari bultzada berezia ematea agindu, baina gauza berririk ez;
kultura politika iraultzeko gogoa agertu, baina aurreko bidera itzuli behar
azkenik; udal lurrak saltzearen aurka gogotik egin, baina 3 milioi euroko udal
lurrak saldu. Jakina, ´gaur hitza eman, bihar haizeak eraman´ edo ´esatea erraz,
egitea latz´. Zuzentasunaren jabe bakarrak bailiran agertzen zaizkigu une oro
Bilduko kideak. Ez da ahaztu behar ordea beste errefrau zahar hau: ´Zumar
zuzenak, itzal okerra´. Dana dala, ikusteko dago, 2006ko Udal Aurrekontu eredu
berri horren nundik-norakoa: ikusteko dago hernaniarren beharrak jasotzen dituen,
auzoen berritzea jasoko duen, irisgarritasunari aurre egiteko gauza izango dan,
gazteentzat babeseko etxebizitzak egingo dituen, Hernanik orain abiatu dituen
proiektu estrategikoak bultzatuko dituen... Hori da eztabaida.
Eta, probetxu pertsonala besteei leporatzeko hainbesteko erraztasuna dutenek,
kontuan hartu beharko lukete beste ondoko esaldia, hau kastellanoa: ´cree el
fraile que todos son de su aire´.
Joxan Rekondo
Alkatea