´Ilegalizazioaz horrelako arinkeriarekin hitz egitea salagarria iruditzen zaigu`

BILDU Hernanik prentsa ohar batean salatu ditu Joxan Rekondo Alkateak egindako adierazpenak. BHk dio ´ilegalizazioari buruz horrelako arinkeriarekin hitz egitea erabat salagarria` dela eta gogorarazi nahi izan dituzte azken Udal Hauteskundeetako emaitzak: ´Bildu Hernani 3.600 boto eta EA-PNV 2.900 boto; Hernaniko Udalean: Bildu Hernani 0 zinegotzi; EA-PNV 8 zinegotzi. Zer edo zer oker dago Hernaniko Udalean ezta?` azaldu du plataformak. Plataformak aipatu du ulertzen duela Rekondok datu hauek gogoratu nahi ez izatea eta diote ulertzen dutela ´Rekondo ilegalizazioaz zer nolako probetxu pertsonala eta politikoa ateratzen ari den gogoratu nahi ez izatea`, baina azaldu dute horren aurrean seriotasun haundiagoa eskatzen dutela. Ilegalizazio egoera gainditu Bildu Hernani plataformak dio ´badirela aste pare bat Hernaniko Udaleko alderdi politiko hauek: EA-PNV-Ezker Batua eta PSE-PSOE, bilera batera deitu genituela, gutun baten bidez, ilegalizazioaren egoera gainditzeko zein urratsak emateko prest zeuden aztertzeko`. Azaldu dute PNV-EAren erantzuna jaso dutela bakarrik eta beraiekin biltzea onartu dutela. BHk eredu ezberdinak Azkenik BHk aipatzen du emendakinen bidez beste udal aurrekontu eredua aurkeztu zuela, ´non lehentasunak etxebizitza politikan, arlo sozialean eta azpiegitura kulturalean kokatzen ziren; non presoen senitartekoentzat, Udalbiltzarentzat eta bonobusarentzat diru partidak jasotzen ziren; non politikoen gehiegizko soldatak eta udal lurren salmenta gaitzesten genituen...`. Honekin lotuta azaldu dute argi dagoela BHk eta udal gobernuko talde politikoek eredu ezberdinak dituztela Hernanirentzat eta ´hori guretzat pozgarria da` bukatzen dute prentsa oharra.