Joan den ostegunean Gobernu Batzarra eta Plenoa elkartu dira Udaletxean eta
zenbait puntu onartu dituzte. Sagastiyako urbanizazio proiektuari hasierako
onarpena eman dio Udalak eta orain 15 egunetan dago alegazioak aurkezteko epea.
Behin epe hau bukatuta behin betiko onarpena emango zaio proiektuari eta Iñaki
Arratibel Hirigintza zinegotziaren hitzetan ´eraikuntza lanak urte honetan
bertan hasi litezke`. Sagastiyan 364 etxebizitza egiteko asmoa du Eusko
Jaurlaritzak eta parke haundi bat egitea ere aurrikusten du proiektuak. Bestalde,
Udalak eskatu du Antziola eta Etxeberri lotzen dituen oinezkoentzako pasabidea
mantentzeko, proiektua gauzatzea.
Igerilekua, Zinkoenea eta La Cumbre
Gobernu Batzarrak onartutako beste puntuetako batzuk dira, Mendi Mendian
Igerileku irekiak egiteko proiektua. Igerileku irekiak denbora pasarako
pentsatuak dira, eta inguruan gune berdeak, aldagelak eta kafetegia izango
dituzte. Zinkoenean berritzeko falta den zatia berritzeko proiektuari ere
hasierako onarpena eman dio Udalak eta kioskoa mugitu eta autobus parada
eraldatzekoa dute. La Cumbreko berrurbanizazio lanen bigarren fasea ere onartu
zuen Gobernu Batzarrak.