ERREGEAK Hernanitik pasa eta hurrengo egunean hasi dira
neguko merkealdiak. Hernaniko Kronikak hainbat dendarirekin hitz egin du,
merkealdien ingurukoak azaldu ditzatzen.
Denda batzuk Errege eguna pasa eta berehala jarri dituzte beren artikuluak
merkealdian. Izan ere, Donostiako denda gehienek horrela egiten dute eta bestela
´jendeak hiriburura alde egingo luke segituan` dio Eukene Rodrigok, Eukene
arropa dendatik. Beste batzuk ordea nahiago izaten dute egun batzuk itxaron,
Erregetako itzulpenak hartu eta merkealdia prestatzeko.
Gabonetako kanpaina, betiko moduan
Denda askorentzat Gabonetako kanpaina oso garrantzitsua izaten da. Aurtengoa
beste urteen antzekoa izan da: ´Ez da gaizki joan - dio Anbotoko Milagros
Mendizabalek - baina ondo ere ez`. Dendari batzuk harrituta daude Olentzeroko
astea nahiko bajua izan delako, baina gero, Erregetan, salmenta haundia izan
dela adierazi dute. Mitxel Kirolak-eko Eve Martinen hitzetan: ´Erregetako astea
beti izan da oso indartsua hemen eta oraindik horrela jarraitzen du`.
Merkealdia, betiko bezeroak eta...
Merkealdian jartzen dituzte neguko denboraldian bezeroaren bistan izan diren
artikulu berdinak. Izan ere, artikulu horiek gorde eta biltegian utziko
balituzte, hurrengo urterako balio gutxiago izango lukete: ´Lehenago, arropa
batek hainbat urtetarako balio zuen, baina orain urte batetik bestera ez du
balio, eta horregatik komeni da lehenbailehen saltzea, merkealdiak horretarako
dira`, diote Anbototik.
Merketzeko protzentaiak irizpide ezberdinen arabera jartzen dituzte dendariek:
taila sueltoei edo urtean kasik saldu ez den generoari portzentai haundiagoko
rebaja egiten diote normalean.
Kronikak bezeroen berri ere jakin nahi izan du. Komertzio txikiko arduradunek
azaldu dutenez, Hernanin herriko jendea izaten da merkealdian berengana joaten
dena, betiko bezeroak. Inguruko herrietatik ere jende asko hurbiltzen da:
Astigarraga, Urnieta, Goizueta... Mahuka arropa dendan Goierritik eta Gipuzkoako
beste lekuetatik etorritako jendea ere izan dute. Beren ustez, hori da igande
arratsaldetan etortzen diren gazteek denda ikusten dutelako: ´Eskaparatea ikusi
eta gero merkealdian etortzen dira, ia zerbait gustokoa dagoen`, dio Nagore
Alvarez-ek. Betiko bezero ez direnak ere azaltzen dira. Milagros Mendizabalen
esanetan: ´Guk arropa denetatik dugu, bai garesti eta bai merkeagoa, baina
arropa garestia dugula uste dutenak merkealdian bakarrik etortzen dira`.
Merkatal zentroen eragina
Jakina da merkatal zentro haundiek eragina badutela herriko komertzioan.
Merkealdian eragin hori nabaritzen da, baina urte osoan bezalaxe. Dendari askok
somatu dute hasiera batean erosleak zentro horietara joaten direla, baina hango
artikuluak segituan amaitzen direnez, gero komertzio txikira jotzen dute berriro,
ia zerbait txukuna aurkitzen duten.
Hala ere, jende asko geratzen da herrian erosketak egiten. Mitxel Kirolak-en
uste dute pertsonaren egoerak asko eragiten duela: ´Adinekoak gutxiago joaten
dira zentro horietara eta haurrak zaindu behar dituztenek ere ez dute denborarik
izaten hara joateko, adibidez`, diote. Beste batzuk zerbitzua baloratzen dute
eta nahiago izaten dute bertan geratu.
Dendari askoren iritziz aparkamenduak dira gakoa. ´Kanpotik datorrenak
aparkatzeko tokirik ez badu bilatzen, ez da herrian geratzen eta nahiago du
zentro haietara joan`, dio Eukenek. Anbototik ere gauza berbera diote Milagros
eta Valentin Mendizabalek: ´Zerbitzu hori ezin bestekoa da komertzioarentzat,
gaur egun gauzak dauden bezala behintzat`.
Merkealdia martxoaren 31ean amaituko da ofizialki. Bitartean, badago zer ikusi,
eta nahi izanez gero, zer erosi.
Merkealdian dauden produktuak denboraldiko berak izan behar dute
Eusko Jaurlaritzak oharra kaleratu du neguko merkealdia dela-eta.
Bertan hainbat gomendio ematen die kontsumitzaileei, eta merkealdietako
produktuek bete behar dituzten arauak ere zehazten ditu. Merkealdien helburua da
denboraldiko kondarrak saltzea, horregatik, dendariek merkealdian jarri
beharreko produktuak denboraldikoak izan behar dute derrigorrean. Ezin dira
merkealdian jarri, hilabete lehenago behintzat prezio normalarekin merkaturatu
gabeko produktuak, ez eta akatsa duten produktuak ere (hauek saldo prezioan
bakarrik saldu daitezke). Eusko Jaurlaritzaren oharrak gogorarazten du
likidazioak, eskaintzak eta promozioak ez direla merkealdian sartzen. Gainera,
merkealdian dauden produktuak garbi seinalizatu behar dira, baita prezio arrunta
eta merketutako prezioa zein diren ere.
Kontsumo bulegoa Hernanin
Hernaniko Udalak badu Hernani eta Astigarragako kontsumitzaileen
informaziorako bulego bat, Zaharren Egoitzan, eta telefono zenbakia du: 943
557854. Kontsumitzaileek dituzten dudak argitu edo kejak jasotzeko zerbitzua
eskaintzen dute bertan.