Igandeko ekitaldiak emango dio hasiera aurtengo txotx denboraldiari

DENA prest dago Hernaniko txotx denboraldiari hasiera emateko. Joan den astean irekiera ekitaldia izan zen Astigarragan, Nafarroan ere jadanik ireki dute sagardo berria probatzeko garaia, eta Hernanin asteburuan izango da irekiera ofiziala, igande eguerdian, Gudarien plazan (eguraldi txarra egingo balu, Atsegindegiko plaza berrian).

Chillida familiaren eskutik
Txotx Komisioak antolatzen du irekiera ekitaldia eta bertan parte hartzen dute Udalak, herriko sagardogileek, Berriak merkatal elkarteak eta Kaxko auzo elkarteak. Aurten Chillida familiak irekiko du denboraldia. Komisiotik adierazi dutenez, Chillida Lekuk Hernaniri egindako promozioagatik eta familia honek gure herriarekin duen loturagatik hartu dute Chillida familia omentzeko erabakia.

Txotx herrikoia
Igande eguerdian txotx herrikoia izango da eta bertaratzen diren guztiek aurtengo sagardoa probatzeko aukera izango dute. Ekitaldia goizeko 11:30etan hasiko da, txalapartariekin. Horren jarraian bertsolarien txanda izango da. Eguerdiko 12:00etan, Aitor Ruiz de Egino artistak diseinaturiko irudi bat emango zaio Chillida familiari eta familia honetako kideek arkupetan jarriko diren kupeletako sagardo berria probatuko dute.
Ondoren, Txotx herrikoiak eta Los Incansables txarangaren soinuak alaituko dute igandeko bazkalaurrea Gudarien plazan.

Herri kirol ikuskizuna
Horrez gain, herri kirol erakustaldia antolatu dute Txotx Komisioko arduradunek. Bertan izango dira Miren Urkiola eta Perurena aita-semeak harri jasotzen, 13:15etatik aurrera.