Rekondok dio BH ilegalizazioan babesten dela ´aurrekontuen eztabaidan ez sartzeko`

UDAL aurrekontuen inguruan Joxan Rekondok, oharra bidali du Hernaniko Kronikara, BHk joan den ostegunean egindako kritikei erantzuten. Alkatearen iritziz berak lehenago egindako adierazpen batzuen aurrean BHk emandako erantzuna ´pobrea` izan da. Rekondoren ustetan BH ilegalizazioan babesten da ´aurrekontuen eztabaidan ez sartzeko`. Ilegalizazioaren aurka Prentsa oharrak dioenez, Udal Gobernua ´beti azaldu da ilegalizazioaren aurka`eta ´udaletxeak sortzen duen dokumentazio guztia helarazten dio BHri`. Horretaz gain, Rekondok azaldu du komisioetan parte hartzeko ´gonbitea` egin izan zaiela plataforma honetako kideei eta komisio horien ordenak, aktak eta abar bidali dizkiela. Alkateak argitu nahi izan du BHk ez diola azken aldian ´inolako bilerarik eskatu` eta bilera eskatu izan diotenean beti hartu dituela ´insultatzera etorri direnean eta guzti`, dio. Aurrekontuen inguruan Rekondok gogorarazi nahi izan du ´argumentu guztiak, banan bana desmontatu` zituela, lehenago bidalitako beste prentsa ohar batean BHren. Zentzu horretan aipatzen du ´Batasunaren papera, Gas Hernani sortzerakoan, Udalari etekin ekonomikorik gabe uzten zion estatuto batzuk onartuz`. Aprobetxamendu urbanistikoa ere aipatzen du Rekondok, aurreko Udal Gobernuak aprobetxamendu horiei ´uko egin ziela` dio eta ´orain guri leporatzen digute hori, aurrekontu hauetan ez denean lur erresidentzialen metro bakar bat ere saldu`, azaltzen du. Horretaz gain, aurreko Udal Gobernuak babesturiko etxeak sustatzeko izan zuen ´inplikazio falta` ere salatzen du alkateak oharrean. ´Argumenturik ez` Rekondok azaldu duenez, hori guztiari ´ilegalizaziori buruz hitz egiten` erantzun dio BHk eta uste du talde honek ez duela ´argumenturik, nireei erantzuteko`. Rekondok bukatzen du esanez aurrekontuak ´inbertitzaileak` direla eta auzoetako bizi kalitatea, kirol instalazioak eta ingurugiroa ´hobetuko` dituztela.