PORTUKO auzoa eta Kaxkoa elkartuko dituen teleferikoa jartzeko lanak hasi
berriak dira eta gustora daude auzoko bizilagunak, aspaldiko eskari bati
erantzuna eman zaiolako. Asmoa da Shangaiko etxetik Udaletxe aldera jartzea
teleferikoak igotzeko eta Udaletxetik zerrategi aldera jaisteko. Obra honekin
lortu nahi da auzotarrak errazago igo eta jaistea Kaxkora, ibiltzeko arazoak
izan litzaketenak bereziki.
Eskailera elektrikoak ez
Urteak dira Portuko auzotarrak igo eta jaisteko zerbait jartzea eskatzen ari
zirela. Hasiera batean eskailera elektrikoak jartzea pentsatu zuten, baina,
dirudienez, inpaktu anbientala haundiagoa izango litzateke udal teknikarien
arabera: ´hemengo klimarekin estalpea egin beharko litzaieke eskailera
elektrikoei, arazoak emango bailituzkete bestela; eta tunel moduko hori
itsusiegia da eta hondatu egingo luke Leoka ingurua`. Gainera, inguru historiko
izendatu dute Leoka eta Kaxkorako igoera eta Europako diru laguntza jaso du
proiektuak.
Teleferikoak probatzen
Udaran, auzotar talde bat teleferikoak probatzen ibili da. Hasiera batean,
teleferiko irekia jartzea pentsatu zuten eta Montjuic-en probatu zuten
teleferikoa. Negurako, ordea, hotzegia izango litzateke eta eskiatzeko pistetara
igotzeko horietakoak jartzea erabaki dute, Udal teknikarien oniritziarekin.
Portuko auzotarrak gustora daude eta adierazi dute proiektua martxan jarri izan
ez balitz pentsatzen ari zirela festetako astoak aprobetxatzea Kaxkotik auzorako
garraiobide berri bat sortzeko.