JOXAN Rekondo Alkateak prentsa oharra bidali du Hernaniko Kronikara BHk Udal
Aurrekontuen inguruan egindako kritikei erantzuten. Rekondoren hitzetan ´BHk
bere burua engainatzen du eta are okerrago, hernaniarrak engainatu nahi ditu,
kasu honetan udal aurrekontuen kontura`, eta Alkateak dioenez ´BHk
pribatizazioaren argumentu erraz zein faltsua erabiltzen du horretarako`.
Lur erresidentziala
Pribatizazioaren inguruan Rekondok dio BHk besteei eskatzen diela ´beraiek
aginduan egon diren bitartean egin ezin izan dutena`. Bere hitzetan ezker
abertzaleak aprobetxamendu urbanistikoei zegokion lur erresidentzialari ´uko`
egin zion ´3 milioi eurotan baloratua`, dio.
Etxebizitza babestuen inguruan, Batasuna agintean zegoenean Alkatearen ustez ez
zen ´tajuzko promozio bakar bat ere bultzatu`.
Gas Hernani-ren salmenta
Oharrak dionez Udaletxeak ez du enpresa honen etekinen ´xentimo bakar bat ere
ikusi`. Rekondok dio enpresa honen estatutuak Batasuna agintean zegoenean sinatu
zirela eta bertako klausula batek ´kanpoan uzten du Udaletxea, etekinen
banaketan`, dio. Gas Hernaniren partizipazioa saltzea horregatik erabaki da,
oharrak dioenez: ´Gas Hernani sortu zen gasa herrira ekartzeko eta helburu hori
bete da, pentsatu dugu momenturik egokiena hau dela salmenta egiteko, ez baitu
inolako etekinik ematen`. Alkatearen hitzetan bertatik ateratako errekurtsoak
´ondare publikoa hobetzeko balioko dute`.
Bonobusa
Bonobusaren inguruan kolaboratzeko prest azaldu da, baina dio Diputazioaren
eskumena dela hori. Bestetik Aurrekontu sozialak badirela erantzun du Rekondok:
´auzo elkarte gehienen parte hartzea izan dute, eta amaierako Aurrekontuetan
jasotako aportazio interesgarriak egin dituzte`, dio.