2006rako udal aurrekontuak jarraitzaileak direla adierazi du Joxan Rekondo
Alkateak. Rekondok argitu du, ordea, jarraitzaileak direla auzoak eta
azpiegiturak berritu eta zerbitzuak hobetzeko konpromisoari eutsi egiten dielako,
Kronikari adieraziaren arabera. Sandiusterri haunditzeaz gain, auzoak berritzeko
prozesuaren barruan, 2006an Udalak Arrigoainpeako urbanizazioa berritzen
inbertituko du diru partida garrantzitsuena. Mendi Mendian egiten ari diren ur
parkeari dagokionez ere, Rekondok gogoratu du bi urtetan finantziatzeko
azpiegitura zela.
Inbertsio asko «zerbitzu asko zabaldu eta hobetzeko egingo dira» Rekondoren
esanetan. «Zaharren Egoitza haundituta pertsona askoren bizi kalitatea hobetu
egingo da. Kiroldegian ere inbertsio haundiak egingo dira teilatua berritzen,
eta tenis pista estaltzen. Berez, horiek zerbitzu berriak izan ez arren,
zerbitzua hobetu eta zabaldu egingo dute» dio Alkateak.
«Integrazio haundikoak»
2006rako udal aurrekontuak EA-EAJ eta EBren aldeko botoez gain, PSE-EErenak
ere jaso zituen eta PP abstenitu egin zen. Alde horretatik, Joxan Rekondo
Alkateak nabarmendu du «integrazio maila haundiko aurrekontuak direla eta
Hernaniko gehiengo adierazgarri batek onartu» dituela. Era berean, adierazi du
Bildu Hernaniri aurrekontuen informazioa bidali zaiola eta jakinaren gainean
egon dela. BHk aurkeztutako zuzenketaz balorazioa egingo duela iragarri du
Alkateak.
Azkenik, 2006ko Aurrekontuen gainean, Rekondok azpimarratu du bigarren urtez
segidan urtea hasterako onartu direla, eta hori berria dela Hernaniko udalean,
eta gestio onaren adierazgarri.
Patronatuak
Andoni Amonarraiz Ongintzako buruak nabarmendu du aurrekontu horiekin
Patronatua saiatu dela ahalik eta behar sozial gehienak betetzen. Adibide gisa
jarri du etxez etxeko laguntzan Diputazioak 29.000 ordu ordaintzen dituela eta
Ongintzak 41.000 emango dituela. Bestalde, Iñaki Barrio Kirol Patronatuko buruak
nabarmendu du «exitoa dela aurrekontua osoko zuzenketa gabe ateratzea». Barriok
azpimarratu du bi urtean kiroldegiko teilatu osoa berrituko dela eta zerbitzuak
haunditu.