Andoni Egañak orain arteko marka guztiak hautsi eta laugarren txapela jantzi
zuen atzo BECen, Euskal Herriko Bertsolari Txapelketako finalean. Ez zion
txapelketari hasiera oso ona eman zarauztarrak goizean, baina, poliki-poliki
gora egin zuen. Goizeko azken saioan bakarkako ona osatu zuen, ´aspaldiko partez
begiak busti zaizkizu` gaiarekin: Andonik zortzigarren egin izanaren pena zuen
eta etxera iristean goizean animoak eman zizkion semeak kontsolatu zuen ´ez du
ajola` batekin. Arratsaldean goia jo zuen zarauztarrak eta laugarren aldiz
jantzi zuen txapela , inongo aitzikiarik gabe. Txapela Imanol Lazkano
bertsolariak jarri zion eta biek ala biek ez zituzten malkoak urruti izan
momentu hunkigarri horretan.
Maialen, hirugarren
Maialen Lujanbiok bere egunik onena ez zuela izan aitortu zuen saio
ondorengo prentsaurrekoan, burua nahi baino nekatuago izan zuela, ´lanbrotuta`.
Hala ere, ez zuen saio txarra egin hernaniarrak, baina, ondo hasitakoa ezin izan
zuen maila berean bukatu. Goizean oso goitik ekin zion zortziko haundian
Iturriagarekin, eta bakarkakora arte ondo aritu zen. Bakarkakoan doinu berria
atera zuen hernaniarrak, entrenamenduetan ondo landua, baina, atzo ez zion zuku
guztia atera Kataluniako doinu zaharrari. Aldarteak aldarte, goian bukatu zuen
Maialenek goizeko saioa. Saiorik politena bakarkoan egin zuen arratsaldean,
beste bi ofizioetan txukun aritu arren. Bakarka entrenatzaile paperean kantatu
zion, futbolean galduta lur jota dagoen umeari: irabazten ikasteko lehenbizi
galtzen ikasi behar dela esan zion neskatoari lehen bertsoan eta lotsatu eta
beldurtu gabe bere buruari eusteko gomendioarekin bukatu.
Iturriagaren potoa
Iturriaga izan zen atzo BECen Egañarekin batean txalorik gehien jaso zuena.
Egun osoan oso goitik ibili zen eta umore puntua jarri zion saioari.
Arratsaldean ere ondo egin zuen bertsotan eta sei puntuko ariketan nahiz
bakarkakoan bikain aritu zen. Buruz burukoak Egaña eta biak parez pare jarri
zituen eta Iturriagak poto nabarmena egin zuen hamarreko haundian, eta hor galdu
zituen txapela irabazteko aukerak. Esan liteke durangarra txapela laztantzeraino
iritsi zela eta bera ere gustora zegoen saio ondorenean nabarmendu zuenez.
Mendiluzeren malkoak
Mendiluzek ez zuen finalaurrekoetako mailarik eman baina utzi zuen jendearen
buruan zenbait ale. Goizeko kartzelakoan bere emazte eta semeari kantatu zien
´aspaldiko partez begiak busti zaizkizu` gaiean eta barrua mugituarazi zien
entzuleei, bene benetako aitorpenarekin.
Horiez gain, Ametsek ere saio oso ona egin zuen atzokoan eta laugarren gelditu
zen Maialenek adina punturekin, eta entzulearen txalo zaparradapean; Sustrai
Colinak ere finalaurrekoetan baino askozaz irudi hobea eman zuen eta erantzun
biziak eta umore fina erakutsi zituen atzo Barakaldon. Elortza oso prestatua
irten da aurtengo txapelketan, baina, atzo ez zuen finalaurrekoetan adinako
mailarik erakutsi eta Jon Maia ere bajuago aritu zen aurreko saioetan baino.