HERNANI Institutuak klase ordutik kanpoko hitzaldi eta tailerrak antolatzen
ditu kurtsoan zehar. Bihar bi zita dituzte, batetik gurasoei zuzendutako
hitzaldi bat izango da Biterin eta emakumearen kontrako indarkeriaren inguruan
tailer bat egingo dute eguerdi partean ikasleekin.
Horrez gain, internetari buruzko mintegiei segida emanez, ostegunean teknologia
berriak negozioetan duten erabilera ezagutarazteko saioa izango da.
Familia harreman orekatuak
Azkeneko urteetan gurasoei, eta interesa duen jendeari orohar, zuzendutako
hitzaldiak antolatzen ari da Hernani Institutuko Zuzendaritza,
orientatzailearekin batera. Hitzaldi hauek familia eta familiarteko harremanekin
dute zerikusia. Bide horri jarraipena emanez bihar hitzaldia izango da Arauak
eta mugak : non jarri? nola jarri? gaiaren bueltan. Hizlaria izango da Maribel
San Sebastian psikologoa eta aztertuko du gurasoen zein jarrera diren lagungarri,
eta zeintzuk diren oztopo, familia harreman orekatu bat izateko. Hitzaldia bihar
arratsaldeko 18:30etan izango da, Biterin.
Ikasleentzako tailerra
3garren adina 3garren mundua gobernuz kanpoko erakundeak antolatuta tailerra
egingo dute bihar Hernani Institutuko ikasleek. Unicefek duela bi urte atera
zuen txosten bat, emakumeak bizitzako etapa ezberdinetan jasaten duen indarkeria
azaltzen zuena. Tailerrean, txosten hori aztertuko dute, ikasleen parte hartzea
bultzatuta. Tailerrak Hernaniko Udalaren laguntza jaso du. Bihar eguerdiko
13:00etan eta 15:00etan, Santa Barbaran.
Teknologia berriak
Ostegunean Informatika nire enpresarako: Askea ala ordaindutakoa da mintegia
antolatu du Miramon enpresa digitalak Hernani Institutuan. Negozioetarako zein
informatika programa diren egokiak azalduko dute eta tresna ezberdinak dituen CD
bat banatuko dute. Izena emateko mezu bat bidali daiteke cursos@miramondigital.com
helbidera ala 943 747 314 telefono zenbakira. Mintegia 18:00etatik 20:00etara
da, Karmelo Labakan.