JAZZ musikaren ibilbidea aztertzen duen kontzertu didaktikoa eskainiko du
gaur Pirineos Jazz Orchestrak, Tam-tametik tom-tomera ikuskizunean. Musikari
itsuarena egiten duen Pablo Salaberri aktorearen kontakizunaren bidez azalduko
dute jazz musikaren jatorria: 17 garren mendeko Europa eta Afrikako girotik gaur
eguneko musika estiloetan jazzak duen eragineraino.
Ikus-entzunezko proiekzio batek lagunduko dio aktoreari eta 8 musikarik
osatutako taldeak garaian garaiko musika estiloak interpretatuko dituzte: Laura
Ridruejo (ahotsa), Mikel Ridruejo (saxo altua), Miguel Fernandez Vallejo (saxo
tenorea), Ramon Garcia (tronpeta), Mauro Urriza (pianoa), Alejandro Mengod (gitarra),
Marcelo Escrich (bajoa) eta Hasier Oleaga (bateria).
Kontzertua gaur arratsaldeko 20:30etan izango da, Biteri kultur etxean.
Kontzertu atsegina eta didaktikoa
Manu Agirre, Pirineos Jazz Orchestrako managerrak azaldutakoaren arabera,
gaurko kontzertua atsegina izango da: ´Jazza askotan elitistatzat jo izan da
baina gure asmoa da edozeini hurbiltzea musika estilo hau`. Jendeak gozatzeko
moduko ikuskizuna eskaintzen saiatu dira, jazzaren sorrera eta bilakaeraren
atzean dagoen jende, kultura eta sentimenduei garrantzia ematen.
Ikuskizun honek kultura mestizajea hobeto ulertzeko ere balio duela dio Manu
Agirrek, izan ere ´jazzaren atzean dago historia garaikidean gertatu den kultura
mestizaje emankorrenetakoa`.
Oso harrera ona
Pirineos Jazz Orchestraren emanaldi hau ikasleei zuzendutako kontzertu
didaktiko batzuen harira sortu zuen. Izan ere musika ikasgaietan, musika
klasikoaz aparte, ez da gauza askorik lantzen. Emanaldia sortu zutenetik herriz
herri ibili dira eta Manu Agirrek dio jendea ´txoratzen` ateratzen dela
kontzertutik.
Jazzak beste musika estiloetan eragin haundia
Agirreren hitzetan, gaurko ikuskizunera joaten direnek ulertuko dute jazzak
zein eragin izan duen gaur egungo musika estiloetan: ´Rapa, heavya eta beste
hainbat estilok gaur egun elkarrekin diraute baina sustrai beretik datoz` dio.
|
12 zatitan banatutako ikuskizuna |
|
|
|