|
AGUSTINETAKO ingurua eta Zinkoenea berritzeko obra osoa
bukatzeko zorian da. Etxeak bukatuta daude eta konbentua berrituta. Konbentu
aurreko plaza ere oso aurreratuta dago. Orain urbanizazio lanetan ari dira,
eta datorren astean dute brea botatzekoa: Zinkoenean eta konbentu bueltan ez
ezik, Antziolan eta Karmelo Labakan. Leku horietan, trafikoa moztu egingo
dute asfalto lanak egiteko. Aspaldian aldatu gabe zeuden lurpeko
instalazioak berritzeko ere aprobetxatu du Udalak obra. Karmelo Labakan
lurpeko zakarrontziak ere badijoaz.
Konbentua berritzeaz gain, Agustinetan 69 etxebizitza, (batez beste 70 m2-koak)
eta 22 lokal komertzial eta aparkalekuak egin dituzte. Eta Udalak ere 600
metro inguru ditu beretzat. Trafiko aldaketak ere ekarri ditu: dagoeneko
jarria dagoen bezala, konbentu buelta osoa karril bakarreko rotonda izango
da. Zinkoeneatik Floridara jaisteko sentidu bakarra egongo da lehenengo
tramoan. Bestalde, konbentu parean, Latxunbetik Antziolara hartzeko sarbidea
itxita geldituko da. Zinkoeneatik Txirrita kalera sartzeko orain arte bezala
geldituko da.
Agustinetako proiektuak 50 plazako hotela aurrikusten zuen. Eskaririk ez
dela argudiatuta, proiektua aldatu eta 16 etxe bizitza berri egiteko
eskaerari baiezkoa eman dio Udalak eta Foru Aldundian dago orain aldaketa
eskaera.
Monjak oso gustora
Agustinatako obra erabat bukatuta dago eta monjak abendu hasieran etorri
ziren Arzeniegatik (Araba) Hernanira bueltan. Mari Karmen Agirre priorrak
Kronikari adierazi dionez, obrarekin oso gustora gelditu dira «arkitektoak
ondo ezagutzen du gure bizimodua, eta gure behar guztiak ondo jasota gelditu
dira». Era berean, Mari Karmen Agirrek aitortu du komunitateari ilusio
haundia egin diola «gure herrira» bueltatzeak. Konbentua goitik behera
berritu dute, eta estruktura bera ere erabat aldatu da. Klaustroa eta
klaustro ingurua da lehengoari eutsiz berritu dutena. Hori da konbentuaren
jatorrizko zatia, eta Ondare Historiko kontsideratua dago. Ikuilua eta beste
zenbait zati osorik bota zituzten, eta espazio berri txikiagoak egin.
Eliza zabaldu, bisitak hartu eta abar egiteko ordea, monja komunitateak
denbora beharko du oraindik. Batetik, urbanizazio lanak direla eta sarrera
moldatzeko daukate. Bestetik, obrak iraun duten bitartean traste asko elizan
gorde dituzte. Orain dena berriz antolatu eta elizari txukundu bat eman nahi
diote zabaltzerako. «Eliza zabaltzeko epe jakinik ez daukagu, baina, guk
lehenbailehen izatea nahi genuke, nahi duenak elizara joateko aukera izateko.
Hernanik beti lagundu izan digu eta eskerrona barru-barruan daramagu» dio
Mari Karmen Agirrek. |
| |
Trafiko mozketak datorren
astean
Abenduak 14, asteazkena
Latsunbetik Agustinetarako sarrera erabat itxiko dute eta trafikoa Urbieta
kaletik desbideratu. Antziola kalera sartu nahi dutenek Latsunbe-berritik
sartu eta Argarain kaletik barrena izango dute bidea.
Abenduak 15, osteguna
Agustinetarako rotondarako sarrera itxiko dute partzialki Astigarragatik,
Latsunbetik eta erdigunetik datozenentzat. Agustinetatik Antziolarako
sarbidea ixteko beharrik balego, Florida aldera desbideratuko dute trafikoa.
Abenduak 16, ostirala
Karmelo Labaka eta Antziolako kaleak itxiko dituzte partzialki. Uneren
batean erabat ixteko beharrik balego, Florida kalera desbideratuko dute
trafikoa.
|
|